Dr Regierigsroot verglyyche mir
Gäärn mit em FCB
Zuegää s bruucht no Fantasie
Zem Gmainsamkaite gsee
Bim Tschudi isch s doch au e so
Wie bim Ceccaroni
Aer hätti langsam s Alter scho
Im Grund gnoo gieng s au ooni.

Z Mülhuuse mäldet d Swiss
Fluugnummere achtesiebzigzää
Bim Sichtfluuglande het s vermuetlig
E Missverständnis gää
Mir hän dr Tower aapeilt
Und die linggi Pischte gnoo
Jetz steen mr uff em Claraplatz
Und hänn e Buess bikoo.

Baasel deent guet, hänn s heggscht Gebäud
E Wirtschaft wo floriert
Mir schutte in dr Champions League
S Theater daas rentiert.
Do froggt me sich halt langsam scho
Gitt s uff dääre Aeärde
Wirgglig no e guete Grund
Als Ziircher geboore z wäärde.

Als Aengeli uff Baasel z koo
Duet sich wirgglig loone
S Aengeli deerf s Minschterdach
Graatis go bewoone
Jetz bättet d Zanolari
S blyyb wirgglig nur bi aim
Denn sii gseet uff em Minschter scho
E Asylantehaim.