E Brief vo do uff Aesch goht nit uff Aesch, kasch dängge!
Dä goht vo Basel via Züri uff Biel-Bängge.
Dört bestimmt en Apparat, e digitale
zerscht dr Durchschnitt vo de beide Poschtleitzahle,
zum denn am übernäggschte Dag uff Speicherfoti
z mälden, ass dä Brief scho lang in Aesch sy sotti
und ass es obe rächts e Katastrophe gääbi,
will dört schyynts d A-Poscht-Margge schreg im Egge glääbi!
Jetz gitts Alarm im Briefposchtzentrum Züri-Schliere:
me soll zerscht d B-Poscht us Biel-Bängge kontrolliere.
Doch leider isch dr Spezialischt, dr Lehrling Bieri,
wo das sunscht macht, mit sym Kolleg in Aesch am Zvieri.
Drum muess dr Chef s Problem em Böschtler z Schliere zaige,
und merggt derby, ass sii scho lang e kain me haige.
Uff das hi schreit är ganz entnärvt ins Notfall-Händy:
Jä unsre Service Public z Schlieren isch am Ändy
und Ihrem Kund in Aesch, däm mien Sy klar bedoone ...
... statt in Aesch ab sofort in Biel-Bängge z wohne!