Uns kam e sicher kuum verstooh
und trotzdäm simmer hitte doo.
Zue uns sinn d’Banggomat-Gnagger koo,
doch zem Booden uss hett men is nit bikoo!
Das hänn die nit kenne verdraage
do hänn’s is aifach – d’Zeehn ussgschlaage!

D’Bolizei ruggt uss mit siebzäh Maa,
und schnallt dr Müllere Handschällen aa!
Dr Haftrichter leggt ere d’Faggde daar;
zäh Daag Kischte, das isch doch klaar!
Zwoor hänn Sie nyt Wiescht’s vom Blocher verzellt,
aber dr Mischtkibelsagg – z’frieh uusegstellt!

„Mami,“ froggt s’Biebli, „sinn das Gäng’s, wo kriege,
dass Lampen und Diire dur d’Stroosse fliege?
Isch’s e Spängler, wo ganz ungeniert
s’Altyyse vorem Huus deponiert?“
„Naj, s’gseht nur so uss,“ maint s’Mami zart,
„wenn s’Drämmli - näbb de Schiine fahrt!“

Wo sy z’London ääne dr Böögg verbrenne,
hett sich d’Queen nimmi halte kenne!
„Say – this man on the Schytterpäggli
mit Carot-Nose and faisse Bäggli,
is this Halfpipe uffem holzige Thron
not Couchepin – your Ober-Gloon?”

Dr Aint sitzt doo, dä hett e Gropf
Dr rächti Arm hänggt no am Dropf
Dr Näggscht isch achzig und senyyl
Däm fählt glaub ebbis am Ventyyl!
Mit Butzeschyyben an dr Brille
Schluggt Ain all Viertelstund e Pille!
Will’s Ainen alls so fröschtelet,
hett er e Thermadeggi pöschtelet!
Ain kunnt uff alle Viere z’schlyyche,
duet eher enere Lyyche glyyche!
En Andere kaa sich kuum me bugge,
dä hett’s wohrschynlig au im Rugge!
Ain isch in dr erschte Raihe gsässe,
das hett er aber scho wieder vergässe!
Studiert isch au no Ain - in Gschicht,
dä lyydet laider unter Gicht!
Am Naasespitz isch Ain entzunde,
däm hänggt halt d’Kappe vyyl z’wytt unde!
Ganz e Junge isch au no doo
Dä hänn’s versehentlig yynegloo!
Ain hett en anderi Mainig ghaa,
däm leggt me grad e Muulkorb aa!
Dr Letscht hoggt stumm am runde Disch,
und waiss scho gar nimm, woner isch!
Uss so aim denn, herjeeminee,
sott’s z’Room – dr näggschti Babbe gee!

Ych kauf als yy – my Frau schrybt mer’s uff,
„bringsch alles koräggt – gäll achtisch druff!“
Doch letschti, do rääblet’s – hett die sich lo goo;
„was macht denn dä Buurekaländer no doo?“
Drbyy hett sy gschriibe, ych sell zem Moschte
zwai Pfund ryffi Biire boschte!

Kuum isch dr Maier wieder doo,
fahrt dä de Schwizer grad drvoo!
Drotz Platte, Schruuben und Scharnier
Sticht dä dr Hang abb wiene Stier!
Im Spittel stehn jetzt Unseri aa,
und wänn au Neegel in d’Schaiche haa!

Dr Michael Jackson, s’isch nit nej,
nimmt gärn e glaine Bueb uff d’Gnei!
Mit de letschte Fään miesst dä drnoo
grad zue uns uff Basel koo!
Do wurdi nonem letschte Schrei
An dr Uni gly e Lehrstuehl frei!

D’Frau Hess schiggt jeedes Kryzzi yy,
gwinnt Guetschyyn, Biecher und au Wyy.
Jetzt schalleret sy au no Aarien und Rogg
verreggter als dr Küblbogg!
Die will als Grien-Horn – wie vo Sinne
au dä Schnaabelbryys no gwinne!

Zem Schluss hätte mer none Värs, e Digge,
doch vorhäär lehn mer d’Zeehn lo fligge!