Paris han y buecht bim Hotelplan,
bi aanegfahre mit dr Bahn.
Denn zrugg grad noch dr dritte Nacht -
so hets glaub au dr Yakin gmacht!

Dr Flugbetriib isch am versande,
s duet kuum e SWISS no z Basel lande.
Im Tower maint en alte Lotse:
“s lauft nit vyl meh als friener z Blootze!“

Do Letschti bin y – myni Liebe,
bim TCS go s Schleudere iebe.
Me sait, ass ych dääwääg grischtet syyg,
wenn y näggschtens in e 2er styyg!

200 Johr sin d Aargauer derby.
und versueche syt denn, gueti Schwyzer z sy.
Sy sin willig und sy gän sich Mieh:
aber Autifahre – lehre sy nie!

Au wenn s em COOP mit Pfanne lauft,
han ych nit ai Ainzigi kauft!
Ych due doch nit my Gäld verloche:
“uff alte Pfanne lehrt me koche!“

Dr „Terminator“ – quel malheur
isch z Kalifornie Gouverneur !
S isch schonemoll Ain uus Eeschtryych ko
vo wäge „Terminator“ und so…