In der Huuswirtschaft het me friehner glehrt
as e Frau dehaim an Kochhärd aane gheert.
Me het vor hundert Joor scho in de Biecher glääse,
as alti Blocher besser sinn als jungi Bääse.

Apropos Metzler Ruth, die het is no guet gfalle.
Si isch die Jüngscht und Attragtivschti gsi vo alle.
Drum hätte mir si halt am liebschte au no gseh
Uf däm Kaländer vo der Junge CVP.

Unsri Frau Wänger, mitti 70 und no zwääg
het syt em letschte Joor e neje Arbetswääg.
Si isch no sportlig fit und duet das jetze nutze,
und statt de Fäärifänschter die vom Mässdurm butze.

Jetzt schafft der Ospel mit vyl Gäld der Schnaabel-Prys,
fir Bängg wo’s neetig hänn, wie dä do byspylswys.
Au wenn der Ospel uns der dopplet Prys wurd zaale:
Mir sinn e SchnitzelBANGG und nid e UBS Filiale.

Jä die Ziircher sinn denn wirgglig nid ganz bache.
Wie die e Ufstand wägem Fluglärm kenne mache.
Sit die vo Süüde lande dien si sich draa steere:
Die mien doch froh syy, as si no Flugi lande heere.

Das kaibe Sujet wurd no Schwirigkaite gää,
wenn unsere Bundesroot e Blatt vor’s Muul miesst nää.
Fir d Frau Calmy-Rey do wurd e Zeedel länge.
Bim Blocher miessti scho e Helge driber hänge!

Jä unser Comitè het au efang kai Wärt.
Aes bringt e Miniaturblagedde uf e Märt,
und machts derby genau eso wie hüt die Maischte:
Aes duet firs dopplet Gäld nur no d Hälfti laischte.

Wo mir bim Stäägeseggle iber d Mässdurmstääge
oobe aako sinn, isch dert e Zeedel glääge:
„I bi halt schnäller gsi – sorry but I can
Die glatte Wänd uf go – Eyre spiderman!“

Bi de BVB git’s wirgglig e so Deppe
Wo ihre Drammaahänger näb de Schiine schleppe.
Zem uns so beesi Iberraschige erspaare
Dien mir vo jetz aa nur no im Combino faare.

Dä Wäggsel nach Paris isch nur fir kurzi Zyt.
Au in d Türkei isch es em glaine Yackin zwytt.
Jetz ka är z Stuttgart doch no e Erfolg verbueche:
Hejo, vo deert us ka är dääglig s‘Mammi bsueche.