Melodie: Das ist die Liebe der Matrosen ...

Doo schmeggt s bigoscht no Alperoose,
doch fir dii my liebe Schatz
het s im Bundeshuus kai Blatz.
Deert dominiere d Lääderhoose
und fir jeedi und fir jeede
gäbt s scho dausigfach Ersatz.

Si kenne dief im Sässel schloofe,
isch au im Saal e Haidegrach.
Daas isch bigoscht kai Katastrophe,
denn am Fryttig fir d Arena
sinn die Maischte wiider wach.

Melodie: Siibe kuugelerundi Söi ...

Dr Waagefiehrer Haiggi Hayer
fahrt mit Vollgaas mit sym Zwaier
nääbe de Schiine, oh herjee,
daas isch typisch BeVauBe.

Melodie: Look at the coffin ...

Gsehsch deert dää Staatssaarg?
D Stadt zahlt en nimme.
Soo kaa me spaare,
d Regierig het s gsait.
Vergiss dyyni Soorge s isch jo no lang nit soo wyt.
Im Zolli het s Laie und die hänn bestimmt,
wenn s Zyt isch dr rächt Appetit.

Melodie: Blaue Nacht am Hafen ...

In dr Nacht, wenn braavi Buebe schloofe,
draimt dr Michael Jackson ganz ellai,
in sym Näscht, äär spiil mit glaine Goofe
Halma, Fang den Hut und Miihlistai.
Doo in Basel haig sogaar e Gleehrte
dr Buebebildli-Doggterhuet bikoo
und dr Uni-Root macht graad s Verkeehrte,
rysst Roose-n-us und losst säll Ungrutt stoo.