Wel d Metzlere vo dr aigene Kathoole-Horde,
bi dr Bundesrootswaal isch versegglet worde,
wird si zem Drooscht – wäge de blaiche Gnoche,
an dr Ooschtere vom Phaabscht scho säälig gsproche!

Zem d Wält rette ernääre sich Leuebärgers dehai,
scho lang nur no vom Tryybhuusgaas CO2,
Das isch Koolesyyri und die gryfft s Hiirni aa!
Soo, und was mache mer jetz mit däm Maa?

Y ha d Hanslifrau gfrogt: „Du loos, wie wärs,
mir bringe das Joor emool kai Blochervärs?“
Do macht si Mais, si wel ain, vo däm und syyne Manne
und verzicht derfir gärn uff e COOP-Pfanne!

Dr Osama bin Busch maint zem Berlusconi
uusekheie dien dii d Tschingge jetz nooni
und loss di joo nimmi lifte, du gseesch uus wie nit gscheit,
als wär dr e Hoochspannigslaitig uff d Biire gheit!

Dr Plaitegaier het bim Couchepin regglamiert,
wel dä d AHV de Hyääne zem Frass serviert,
y froog my als Bänggler - bi dääre Moogel-Sippe,
wär griegt dr Schnaabelbryys und wär het Voogel-Grippe!