Dä Sprüngli im Bahnhof, dasch verruggt wie dä lauft...
au ych ha so Luxeburgerli kauft
und gmerggt, wie guet die Kuugele schmegge,
jetz blyyb ych derfir in der Rollstääge stegge!

Buurereegle:
Jetz bruuchts no zwai so Kuugle,
denn kasch my uffs Perron ruugele.

Waisch, was der Blocher fir e Ghaimnis het?
Dä liist im Ghaime als im Bett
under der Deggi bis zoobe spoot
"Der Globi goht in Bundesroot".

Buurereegle:
Em Blocher waggst jetz näbscht em Ränzli
hinde glyy e Globi-Schwänzli.

Der Aernscht vo Aesch drambbt in e Schäärbe
und huucht z Basel uff der Notfall: „Lehnd my stäärbe...
ych wott verglemmi kai Transfusion
mit Bluet uus eme fremde Halbkanton!“

Buurereegle:
Glyy gänn sich bi der Hülfteschanze
der Straumaa und der Conti uff e Ranze.

Schaltjoor ischs, ych ha - juhee -
der Leuebärger aimool lächle gsee.
Ych han ems gsait, do froggt my dää:
„Kaan ych d Glämmerli wiider uuse nää?“

Buurereegle:
An dääre Schnuure gseet me glyy:
S muess der ganz Daag zwanzig ab Achti syy.

Im Drämmli darfsch jetz nyt me ässe,
au s Dääfelischlotze kasch vergässe.
Sythäär macht der Schuuflebuur
im Säggserdram sy Schlangghaitskuur.

Buurereegle:
Im Zwaierdram im hindere Waage
keert s der vorm ellai der Maage.

Der Ospel ka mi nit verfiere,
mii am Schnaabelbryys go z produziere.
Im Geegedail, doo zaig ych d Gralle,
ych bi doch nit e Bänggler-Schnalle.

Buurereegle:
Klinge... klinge... klingelingeling...
„Wes Brot ich ess - des Lied ich sing...“

In der Nationalroots-Schlacht
het d Wirz von Planta Letschti gmacht.
Jetz pfyffsch halt, dasch e Tipp, e gscheyte,
bi de ‚Alte Abverheyte‘!

Buurereegle:
Au d Metzlere lauft, ihr glaubets nit,
dert jetz schynts im Vordraab mit.

Im Grand Casino nämme dir aiarmigi Bandyte
das wo de gspaart hesch fir schlächteri Zyte.
Unseri Styyrverwaltig machts glyych z letscht amänd,
nur nämmes die grad mit baide Händ.

Buurereegle:
Es krait der Güggel von dem Mischt:
„S git nyt me z hoole - wo nichts ischt!“

Vor de Waale verdailt d CVP
orangschi Zaanbürschtli als Wärbe-Idee.
Dä Gääg isch glunge, das muess me saage,
si hänn suuberi Zeen, aber nyt me z gnaage.

Buurereegle:
Der neuscht Slogan vo der CVP:
Oh jeminee, oh jeminee!

Es sinn d Italiääner vo Como bis Rom
wääg eme Baum im Graubünde kurz ooni Strom.
Die wääre lieber, wenn scho ooni,
statt ooni Strom ooni Berlusconi.

Buurereegle:
Drotz em Lifte vo de Falte
blyybt punkto Gsinnig alls bim Alte.

Der Meier glopft an d Himmelsdiire,
do rieft der Petrus hindefiire
in syyne Birggestogg-Sandaale:
„Gang zerscht zrugg, der Sarg go zaale!“

Buurereegle:
S koscht glyych vyyl, eb d wotsch loodere
oder nur vermoodere.

Ych ziigle näggschtens uff e Mars,
nit wäägem Blocher und nit wääge Sars.
Vo dert, so han ych uusegfunde,
bruucht e Boschtkarte heggschtens zää Sekunde.

Buurereegle:
Au unseri Boscht isch schnäll, muesch gsee,
s koscht als wie schnäller als wie mee.