Tätyterätätätä so deents am Radio
sy wärde uff der Autibahn guet zwai Stunde stoh
mir hänn mit der SBB dä Stau umfahre welle
derfir stehn mir jetzt z’ Basel uff der Bahnhofs-Passerelle

D’BVB plant neiji Gleis noh Weil und St. Louis
zem dert äne lädele, wär wär do nit derby?
mir wäre zwor scho z’friede und s’deent fascht e bitz absurd
Wenn’s Trämmli zerscht in däne Gleis wo doo sin fahre wurd

Was het me sich fir Mieh gä mit de Flugi vo der Swissair
doch wenn mir ehrlig sin, das neue Logo gfallt ys nit sehr
s isch Hans was Heiri, SWISS was BELL, s isch wurscht wie die das gstalte
denn d’Wirscht wo s'Gschäft bestimme dien, sinn immer no die alte

d’Müllere het im Konsi iber zwanzig Pfanne kauft
jetzt wisse mer wieso der Müller sythär Amok lauft
jä bisch denn du plemtschäpperlet, es waiss doch jede Gnoche,
e Buurereegle sait: uff alte Pfanne lehrt me koche!