Der Absänder oobe linggs, und zwoor brezyys!
Symmetrisch rächts e Frangge-Margge – e stolze Bryys!
Adrässe, Format, Farb, Diggy und Gwicht,
do schaffsch glatt e baar Stunde;
Und segglisch ändlig mit em Brief uff d Boscht
isch au die Filiale verschwunde!

Der Hansli froggt ganz schüüch sy Danti:
„Loos Danti sag, was haisst AVANTI?“
„Dasch italiänisch und heisst schnäll vorwärts koo,
ooni sich lo z steere.“
„Aber Danti, sag sotten unseri Schyyfaarer nit
ändlig italiänisch leere??“

Im Ländliheim glagt d Maiere: “Es isch scho arg!
Jetz zimmeren ych mir halt my aigene Sarg!“
Au d Schöpfere wott en aigeni Urne töpfere;
numme d Huebere kaa sich um alles foutiere.
Die het none Schreebergärtli bim Eglisee –
und wott sich lo komposchtiere!!

„Jenaaii ! “Isch dää jetz scheen, dä Berlusconi!
„Noo scheener wäär Itaalien ooni!“
In der Schwyz het äär sich d Auge lifte loo,
dää soll sich nie me doo lo bligge,
und falls doch, no miesst me s näggschte Mool
zää Santimeter wyter oobe fligge!

Vo Schönebuech uff Dittige
Zeglige - Wäislige - Ittige
Denn Buebedorf, Allschwil, Rynach, Aesch ,
deert hämmer ebbys miessen ässe;
z Muttenz hänn si sen ändlig ghaa: Verdeggel!
Jetz hämmer die Pfannepünggt vergässe !