S isch alles Clara und au uns isch äntlig klaar,
jä unsri Clarastrooss isch jetz e Boulevard!
Mer hän scho gmaint, der Sinn und Zwägg syg untergange,
me haig e Yebigspyschte baut mit Slalomstange.
Es het au s Dante Clärli fir e haisse Lumbbe
in der Bauzyt miesse iber d Grääbe gumbbe.
Doch ooni Baustell, ooni Auti heerscht jetz Rue,
drum mache gwissi Lääde, wo kai Rue wänn, zue!
Derfiir git s schyggi Restaurants, das wisse d Kenner,
und au no bassend schyggi Lääde wie der Denner.
Und gseesch vo doo au, wenn d am Duurm duesch uffe blinzle,
fascht zooberschtoobe hinterem Glaas, wie sy dien brinzle
Nai, s het sich gloont, dä Uffwand, und mer saagen iine;
immerhyyn faart s Drämmli doo no in de Schiine!

Der Hakan und der Murat hän fir d Mamme gspaart,
will sii all zwaite Daag zem Bueb nach Ditschland faart,
und hän, damits fir d Streggi Basel-Stuttgart länggt,
der Mamme naagelneii Pneu fir s Dreiraad gschänggt!

Jä an däm Stroomussfall im Land vom Berlusconi,
do syygi d Schwyz draa dschuld, bewiise isch das nooni!
Denn bi däm Maa het s doch scho lengschtens d Biirli butzt,
das gseesch em aa, do het au s Lifting gaar nyt gnutzt!

Hit mache mer zämme gfillte Druthaan gspiggt mit Spägg.
Zeerscht zupfe mer die letschte Fääderli ewägg, ewägg.
Fir d Fillig bruuche mer Mayonnees und ghaggti Ziibele
und dien duur d Finger alti Wienachtsgutzi riibele.
Denn wiggle mer en yy mit zwai drei Bletter vonere Zyttig,
die sin bedrepfelet mit Wyy vom letschte Fryttig.
Die Kreatioon entwigglet soo e bsundre Guu!
Soodeli, jetz bringe er daas em Dabbeljuu!