Sali zämme – mir begriesse Frau und Maa,
gly feen mir mitem Singen aa.
Doch vorhäär – s’gitt halt e bitz e Buff,
stehnd doch bitte alli uff!
So – nämmed jetzt wieder Blatz am Disch,
mir hänn gseh, dass kai Stuehl uss Plastigg isch!

Bim Schwiizer Färnseh kasch – oh jeh,
als wie meh – neyi Sändige gseh!
Bi Blägg und Blond streggt nundefaane,
dr von Rohr s’blutte Fuudi aane!
Äggsgyysi – au geg’ dr sterggschti Wind,
gsehsch nit – isch’s dr Arsch oder isch’s dr Grind!

Kebap-Ringer, Dürüm-Schletzer,
Gyros-Verdrugger, Lahmacun-Wetzer,
Falafel-Würger, Baklava-Schlugger,
Alpay-Rowdie, Börek-Mugger,
au Döner-Frässer dien sy verdraage,
nur 4 : 2 derfsch nimmi saage!

Letschten Oggtober simmer verschrogge,
dr Guggugg – isch in dr Uhr bliibe hogge!
Worum esoo ebbis vor ka koo?
Mir frooge dr Dierarzt subito.
„Wohrschynts“ – so hämmer vom Doggter vernoo,
„hett dä die Stallpflicht z’wertlig gnoo!“

Syt z’Basel e Frau Herzog regiert,
wird mit Rambasse-Dialäggt parliert!
Mir hätte so gärn au e Helgeli gmacht,
probiert hänn mir alles – Daag und Nacht.
S’hett aber verdeggel nyt welle goo,
s’isch aifach kai Profil uusekoo!

In Syrie buddlet me mit Verstand,
e Riese-Kameel ussem Wieschtesand!
Mir hänn das Skelett gnau iberwacht,
und stossen uff e schweere Verdacht:
Do hänn doch d’Zircher garantiert
d’Orgaan scho doomols transplantiert!

Ich komme vom Land zu Ihnen am Rhy,
will den Abschtieg vermydde – gellen Sie.
Alles ischt einfach anderscht hier,
ne groosse Stadt, die Arena, das Bier,
nur euer Maskottli – das Geissbock-Vyych,
stinckt im Oberland gnau glyych!

Uff Basel kemme, s’isch e Verdruss,
als wie meh Lyt vom Boschporus!
Sie dien s’Glaibasel unterwandere,
kaufe dert Hiiser – ains ums andere!
Und d’3 E hirne, bi schwärschte Bedängge,
wo sie wänn d’Fäähnen aanehängge!

Wäg dr Vogelgrippe macht dr Kuehn nit lang,
und sperrt sy Liebschti zwai Monet in Gang!
Energisch proteschtiert d’Frau Kuehn:
„Ych bi doch iberhaupt kai Huehn!“
„Isch Wurscht“ – sait är zu synere Frau,
„aber d’Hiehnerauge zellen au!“

Vo de Pitbull hämmer d’Naase voll,
mir finden au ihri Halter nit toll!
An dr Bundesfyyr miesst me die – noo dis noo,
mitsamt ihre Hind uff’s Rütli loo;
dert hätt’s – me sott das nit vergässe,
gnueg bruun’s und stinggigs Fleisch zem frässe!

In Dytschland isch me wieder ganz oobe,
s’fiehrt d’Angela Merkel ihri Schwoobe!
Sogar in Rom, dert isch jetzt – bref
e Schwoob dr neyi Weihrauch-Chef!
Doch mir hoole die wieder zrugg uff d’Ärde,
will mir jo das Johr – Wältmaischter wärde!

Wär hett den SBB ain yynebrätscht,
dass es d’Stroomversorgig uusedätscht?
Das ka jo nur en Aaschlaag syy!
Do goht vom Tessin en Aaruef yy:
„Isch vo Osteria di Kukkischeffmaa,
Risotto finito – kaschi Pfuus wieder haa!“

Mischt lo ligge koschtet e Lappe,
schiffen im Freie macht e Fuffzger uff d’Kappe!
Sottsch au no grad dr Schysser haa,
denn brennsch none Zwanzger supplément!
Jetzt gehn mir, sunscht mien mir en Achzger bringe,
will mir z’lang am glyychen Ort dien singe!