Wenn d ummeluegsch, denn frogsch dy scho - wasch loos mit unsre Junge?
Die reede nur per Deelifon - und das mit brochner Zunge.
Im Kindsgy isch jetz Hochdütsch Pflicht, soo kunnts dängg noo dy noo,
ass kuum me ein vo unsre Kids ka Schnitzelbängg verstoo.

Dr Oschpel woont jetz z Wollerau und dört verstoot en au kai Sau.

Dä Einheitsstuel bim Uusestuele isch e Schyssydee,
das kasch bygoscht am Byschbyyl vo de Hundehalter gsee;
die mien dr Stuel vom Fyffeli ins Plastygggüggli due,
und drampsch du dry, hesch nundedie – e Plastiggstuel am Schue.

Wenn d Schneidere walkt, duet si verschregge, wenn d Stägge dief im
                                                                       Plastygg stegge.

Dr Suppethurner Bischof Koch – kocht sy eige Suppe, -
denn d Meinig vo däm Heer do oobe, isch däm völlig schnuppe.
Das bringt dr Sabo und sy Gmeind – au di und mi in Rage,
denn d Potage, wo dä Koch do kocht, isch reinschti „Sabo-tage“.

Es droot dr Koch im Sabo Franz: Schwyyg - sunscht künd dr s Abo ganz.“

Für d Affe wo im All gsi sin, gits z Amerika
en Altersheim mit Psychiater, allem drum und dra,
dert gseen sy färn und luuse sich, sy lümmle, loose Blues,
dr Bush straalt: „Die hän s glych Programm, wie n ych im Wysse Huus.“

Das Heim isch für en Aff e Pfusch, dä sell doch mitem Bush in Busch.

Dr Freisinn het d Frau Frei im Sinn, doch die isch nid so frei,
will iire Maa im Miliö moppert, gits e Riisegschrei.
„Me will my nit, denn will y nümm“, seit sii mit schmaale Lippe,
“du Felix y ha wider Zyt und ka bi dir go strippe.“

Do seit dr Felix: „Saskia – hey. S isch schön machsch du di wider frei.”

Dr Dimitri wird sibzig und är het no alli Zeen,
si runde Kopf mit Pilzfrysur isch eifach wunderschöön,
är schynt so einzig uf dr Wält – doch wüsse mir sit geschter,
nit wyt ewägg im Bundeshuus – läbt sy Zwillingsschweschter..

Verloo di nie uf die Verwandte, plötzlig glycht dr no e Dante.

E Schugger muess säggs Buesse ha – mol säggs git säggsedryyssig.
Ihr frooged ech: worum mol säggs? – dä isch doch nit so flyyssig.
D Erkläärig isch: Bim Buessegää – mien sächs Maa zämmeblyybe,
ain wos gseet und zwei zum Rächne – drei zum richtig Schryybe.

Wenn d brünzlisch,wird me di miesse biesse,wenn s sy losch - wirdsch es
                                                                             biesse miesse.

Dr Rotscher hüült, dr Lambiel au, es kunnt eim sälber s Wasser
für dr Boode wär das guet, dä hättis gärn vyyl nasser.
Dr Bundesroot weiss um die Noot, kunnt uf die glyych Ydee
drum kasch dr Moritz, wenn är schwätzt, ständig hüüle gsee.

Bim Wasserlööse dänggt e Maa, ass das dr Rotscher besser ka.

Wennd e Kampfhund züchte wotsch, bisch für uns e Lappi.
Trotzdäm wüsste mir s Rezäpt: De bruuchsch e Donne Schappi,
e Schnuure vome Krokodil – em Diiger syyny Datze
und wennd e ganz e rächte wotsch – em Blocher syyny Fratze.

Dä Hund, dä däät ys – eerlig gseit- nur wägem Gsicht e bitzli leid.

Gäll, wemme vo de Raaser liist, könnt me raasend wärde,
he gits denn soovyyl hooli Köpf uf unsrer schööne Aerde?
Dr Arnold ka kai Raaser sy, denn bi däm dumme Lööli
entstoot – wennd s Hiirni uusenimmsch – nit emool e Hööli.

Bi uns het – Arnold liebe Schatz - sogar die ganzi Faasnacht Platz.

Was wäre Ferie ooni Kuoni – d Wiehnacht ooni Gschängg?
Was wär dr Toni ooni s Moni – d Faasnacht ooni Bängg?
E Schnitzel ooni Peperoni?
s Atlantis ooni Ceccaroni?
Italie ooni Maccaroni?
E Fläsche ooni Trappatoni – die wäre gar nyt ooni,
nur d Wält wär besser goppeloni – ooni Berlusconi.

Ooni Sex bis zu de Waale, ka dä das denn nümmi zaale?

Für „d Sicherheit im Noochverkeer“ – das Motto isch e Hit
duet d BVB Kondoom verkaufe – ooni oder mit...
E Grytte meint zum Schatz im Bett: „ Du gäll, dä hesch vom Drämli?
Das mergg y grad, denn bis de kunnsch, - joo, do wart y nämli.“

Duesch fescht im Dram in Gummi huuche, kasch en grad als Airbäg bruuche.

Als Bangg muesch au e Vorbild ha, mir hän dr Latour gno,
dä het wie mir au zmitts im Värs sy Verein verloo:
Aadie mitenand.