D SBB, die hilft dr spaare,
will ooni Zigis Zug muesch faare.
Und dr letschti Zug, jo dää,
dä muesch jetzt vor em Bahnhof nää.

Sie wänn wyters Laid verhiete
und wänn Kampfhind ganz verbiete.
Mir fände sone Gsetz famos:
Denn wär me au dä Blocher los.

S Comeback schyynt der Hingis z glinge.
Sie ka s Racket wieder schwinge.
Clean und fit isch sie erschiine.
Ainsam blyybt nur d Weschmaschine.

Was sie alli wisse sotte:
Fasnachtskiechli sind verbotte.
Denn die hänn, so waiss me hitte,
dr Fyynstaubgränzwärt iberschritte.

Me will rund ums Stadtcasino
Neii Glais fir dr Combino.
Doch das Gäld kennt me sich spare,
will d Combino jo nie faare.

Do kasch flueche, do kasch tobe.
Unsri Swiss gheert jetzt de Schwoobe.
Die dien sich gierig alles schnappe,
sogar dr Stuel vom hailige Bappe.

Iir hänn sicher scho erfaare:
au mir Bänggler mien jetzt spaare.
Und mir singe ooni Rue,
aber nur uff Budget-Schue.

Bi Menscherächt vom Unggle Säm,
bi Klimasinde usserdäm,
do settsch dr d Oore nit verstopfe,
aber uff dr Bus(c)h go glopfe.

Als Bänggler simmer uff der Route
und dien bänggle und nit schutte.
S Yakins sind nit uff der Route.
Das sind Schutter, wo nit schutte.

S tuet is zwor wee in unsre Härze,
doch dä Helge mien mir schwärze.
Au wenn si Pointe no so schetze,
mir wänn kai Muselmaa verletze.

Punggto Zit sind mir verwirrt,
denn d Gugguggsuur isch fescht plombiert.
Und unsre Guggugg liegt im Bett,
will är befoolni Stallpflicht hett.

Bi der Bahn do wird rangiert,
miedi Loggi ussortiert.
S Hamatschutschu, wie me waiss,
kunnt jetzt au uff s Abstellglais.