Das mit der Kirche wird is langsam immer klarer
Hierarchisch wärde si nach obe unfäälbarer
Aber zooberscht isch nimm Gott das isch doch fräch
Denn am unfäälbarschte isch dr Guido Zäch

So glaini Buschikepfli mit so wenig Hoor
Hänn inere Zytig nyt verloore, s isch doch woor
Wäg de Frisuure und em Alter fallt is yy
Es kennte Statthalterkandidate syy

Jetzt isch die Vogelgrippe definitiv im Weschte
Und duet doodermit Europa voll verpeschte
Doch is Schwitzer ka das iberhaupt nit steere
Will mir zum Gligg jo gar nit zu Europa gheere

Au in de Staate wärde d Vire nie erschyyne
Denn ooni Visum kemme die jo dert nit yyne
Und geen si trotzdäm wärde die das bitter biesse
Will den d Amis mit de Panzer uf se schiesse

Was d Novartis alles griegt so isch am Änd
Dr Bau vom Hyyniger Tunnel letschtlig konsequänt
So kenne d Politigger vom Bruederholz bis Rieche
Denn em Campus ganz ins A–Loch ine krieche

Es kunnt an Schalter an dr Spiegelgass d Frau Hingis
Und faslet unverständlig eppis vo de „Binggis“
Si sell noch Basel fir ir Combäck haig si gheert
Und zwor in Kindsgi well me dert schyynts Hochdytsch leert.

E Drämler riefft noch vorne iber Fungg
Gang uf d Sitte jetzt kumm yych sunscht mach i Stungg
Mir maine d BVB kennt ganz e Huffe spaare
Si wurde efters wieder näb de Schiine faare

Es sait zem Edelmaa im Ghaime d Gigi Oeri
Dass er als Hampelmaa doch aigetlig nit steeri
Doch wenn er goot denn miechti sie das Amt halt au
Näbem Eier leege, Wulle, Milch au d Sau

Syt die Sammelaktion in Basel lauft
Hänn mir Hoffnig und e Stigg Casino kaufft
Kauffe au Sie eins und stelle s dehaim uf e Tisch
Denn ka der Baarfi nämlig bliibe wien är isch

Dr alti Phaapscht im Stäärbe gseh das het is gfalle
Eerscht rächt dr Petersdoom als grossi Lyychehalle
Mir empfääle no als passendi Belyychtig
Die neii Zyrcher Bahnhofstrooswiehnachtserlyychtig

Em iible Kleiderwildwuggs däm goot s jetzt an Kraage
Bald wärde d Schieler wieder Uniforme draage
Und au die Grosse kenne dank de Baudep-Fritze
Nur no in Uniform in Gartebeize sitze

Die Blagette mit däre grosse offne Glappe
Gseet jo uus als wärs e Blocher-Blääch-Attrappe
Dass dä Vergliich e bitzli hinggt das gänn mer zue
Denn in Basel isch nach drey Daag wieder Rueh