Z’Auschtralie het’s e Huffe Känguru
und zmitts e Glotz, e Fels, dr Uluru.
Ych stand drvor und dängg: Momänt, das han y doch scho gseh:
e Pflogg und ringsum flach, dasch d’SVP.

S’git Lyt die dien – au wenn si glatt verliere –
in ihrer Karriere avanciere.
Dr Schöder isch nimm Kanzler, macht mit Ärdgaas Gäld wie Hai,
wie d’Natie-Elf mit ihrem 4:2.

Im Gryzgang hindrem Minschter – syg’s wie’s well –
Hänn mir dr Mantel gstohle vomene Gstell.
Dr Pfarrer Chrischt het’s gseh und schimpft: „Jetz sag worum Du raubsch!
Isch s’Schnitzelbänggle alles, wo D’ dra glaubsch?“

Wenn roti Glötz am Färnseh umesause,
denn waisch: jetz het SF1 grad Pause.
„He nai,“ sait do my Maa, „jetz lueg doch ändlig richtig zue:
Dr Moritz git dr Swisscom grad dr Schueh.“

Easy-Jet tuet laufend expandiere
mit Deschtinatione, wo rentiere.
Ab Summer git’s e neie Flug, dä wird’s denn total bringe:
Jedi Stund diräggt uff Läufelfinge.

Ych ha im Elsass joggt – ou Sie, dert stinggt’s!
My Kind isch in e Gruebe gheit. Jetz hinggt’s.
E Laschter kunnt, fahrt ruggwärts in das firchterlige Gniel,
bringt Sunneschirm und dausig Plastiggstiehl.

D’Finanze am Theater wärde knapp.
Me mungglet s stärb e Sparte vellig ab.
Dr Delnon sait: „Mr mien der Schwaanesee vom Schpielplaan näh.
Y ka de Schwän kai Tamiflu meh gäh.“

My Mamme het my sträng und guet erzooge.
Ha in mym ganze Lääbe no nie glooge.
Jetz stand y do, kai Stell, kai Stutz, halt my an jedes Gsetz.
Y bi kai Ackermaa und au kai Fetz.

Ganz Basel muess jetz zinftig lehre singe,
im Taggt vo rächts no linggs e bitzli swinge.
Dootelieder, Bach-Choräl und au e Gospelgsang.
Mit Gospel, Ospel, we shall overcome.