Gälle Sie, dr Verkehr wird als wie aggressiver
und d’Ussdruggswyys au primitiver
uff myner Fääri hett ain duuredraait – verdelli
nur will ych ihn gfroggt haa, wo äär aane welli

In Rieche isch d’Enttüschig gross
sie kunnt halt doch, die Baumfreystrooss
ai Voordail hett’s zwar für d’Schneidere jetze
sie kaa ihri Plastigg-Schtiehl dur Holz ersetze

S Stadtmarketing Basel strängt sich aa
me wirbt mit Basler Läggerli, woo me kaa
doo hänn’s anderi lyychter, die hett dr Himmel gschiggt
hütt waiss scho halb Europa, wo Röschenz liggt

Im Prinz Charles sy Hochzyt – was an sich cool isch
bewyyst uns doch no, ass äär nit schwul isch
jetz hoffe mir und äär wohl au
sy Partnerin syg wirgglig e Frau

Sie gsehn doo, es isch zwar vyyl verlangt
Dr Zubi, wie äär d’Balle fangt
aber so wie n y dää kenn, hinterhäär
sait äär sicher no, das syg nit äär

In d’Apothek, doo kunnt e konschternierti
parfümierti, Proschtituierti
und bringt’s nur miehsam über d’Lippe:
Hett’s no Tablette gege d’Vöögel-Grippe

In Züüri hett’s letscht Joor soo Bääre gha
jupeidi und jupeida
falleri und trallalla
e Sinn hett’s natürlig kaine ghaa

Und dr ainzig Bäär mit e bitz Verschtand
dää isch denn ab, ins Bündnerland
Sie, dää isch dr ganz Wääg gloffe
uff d’SBB kasch jo au nümm hoffe

In dr Grien 80 hett’s letscht Joor Dinosaurier ghaa
jupeidi und jupeida
mi wurd das wundere, denn die sinn jo schöön
wenn sie näggscht Joor nit au in Züüri schtöön

Dr Murat Yakin losst nit lugg
äär kämpft sich immer wieder in d’Mannschaft zrugg
das isch en Erfolg, wo me bewundere sotti
äär figuriert au daas Joor uff dr Mannschaftsfotti

Wo d’Micheline so stürzt, am Stroosserand
hett’s ere nütt gmacht, usser e bitz d’Hoor durenand
doo maint verwunderet dr Merz, dää Schelm
und ych haa immer gmaint, das syyg e Helm

Nach dr Ent-Zanolarisierigs-Phase
gheit die näggschti, d’Saskia Frei, uff d’Naase
dass es Fraue bruucht, hänn mir mit bikoo
ihre Maa, dää waiss jo ganz gnau, wo