E bunte Maie fir in d Vase, e zäärtligs Schmitzli zmitts uff d Nase,
s obligaate Händeschittle isch ganz waich.
Der schwuul Secondo Janiak zipflet ganz nervees am Frack,
vor luter Partnerschaftligkait isch äär ganz blaich.
E jungi Brutt am Bundesplatz luegt dää siessi Reige aa,
"s isch guet", sait sii zue iirem Schatz, "dass die nie Kinder kenne haa!"

Mir dien z Basel sälbverstäntlig Trottoirrändli ändere äntlig,
denn mir hänn's jo, also muess der Pulver wägg,
iiber s Spaare schimpft me jetz und versteggt sich hinder Gsetz,
was speeter kunnt, das interessiert is doch kai Drägg!
De gseesch, wie d Schneidere banaal fir Stiel uss Plastigg ummespuelt,
uns isch doch s Materiaal egaal, Hauptsach die wird uusegstuelt!

Me sett bim Bluet nit iibersee, Null und A goot nit mit B,
das leert doch jeede Lappi scho im eerschte Joor.
S gheerti suuber uffnotiert, wenn me eppis transplantiert,
numme d Zircher maine, das syg gaar nit woor.
Jetz deerfti d Spitzemedizyn jo wool an Ziiri iibergoo …
mir wuurde deerte nit emool d Zeecheneegel schnyyde loo!

Der Werni Edelmaa hett dänggt, i sag der Gigi, dass es länggt,
s Kabbittel Oeri isch verbyy, es isch so wyt.
E Rais hett iin uff Londe gfiert, äär isch der Thämse noo spaziert
und macht e Niggerli am Bach zer Mittagszyt.
Doo hänn die sofoort, s isch nit glooge, Gummikissi drunter gleggt,
und iin zem Haafe uuse zooge – bim Waal isch s Ganze abverreggt!

Mir hänn doo letschti diskutiert, wie me richtig uriniert,
wie bim Brinzle meegligscht nyt dernääbe goot.
Jeede Bueb und jeede Maa hett scho zimpftig Lämpe ghaa,
s gheert sich nit bim Bybby mache, dass me stoot.
Derbyy isch das der greeschti Saich, z maine, dass me besser braich,
duesch vor der Schissle nämmlig hogge, kunnsch beschtefalls bis zue de Sogge!

Wenn de LSD duesch frässe, duesch s Gedanggeguet vergässe,
Zyt und Ruum, die geen in d Wolgge – tschau, das wäär's!
Hesch die Drooge in der inne, schwäbsch im All und foosch aa spinne,
nütt als Faarbe uff der Wält und in däm Väärs.
Und isch der Fyynstaub au no doo, denn kumuliert sich's noodysnoo,
d Anita Fetz, die spinnt scho jetz, derbyy hett die no gaar nyt gnoo!
D Swissair groundet, hett no money, d SBB kai Stroom – soo funny,
nyt mee goot, es blybt halt aifach alles stoo.
Au d Armee griegt uff e Grind, iire fäält e ächte Find,
der Sämi Schmid muess doorum zimpftig Fäädere loo.
Doo hett der Bischoff Koch in syynere Wält halt scho die göttlig Rue,
dää schwäbt, hett Stroom, hett Gäld – und denn der Sabo noo als Find derzue!

Em FC Basel meerggt me aa, es goot em numme soo-la-la,
au wenn er jetz im Tabloo wiider voorne stoot.
S zaigt sich voorzue und scho lang, s Käschtliruume isch im Gang,
was doo so alles ziiglet, kunnt und wiider goot!
E glaine Tschäps maint jetz spartaanisch zem Zubi, deere lange Stange:
"Tama o Tore!", dasch japanisch, und haisst ganz aifach: "Balle fange!"

Jä, au miir dien das begriesse, wenn bim Spoort so Drääne fliesse,
bsunders denn, wenn's groossi Freudedrääne sin.
Alli Beschte mien hit briele, denn die Gfüül, die dien so wiele
und die Brielerei, die isch zem Bryys e Gwinn.
D Saskia Frei, die kaa nit hüüle, s findet's kain vo uns normaal,
der Moppert blybt als Rootliecht-Büüle iire ainzige Pokaal.

In der Boscht froggt die am Schalter: "Sii bruuche doch e CD-Halter,
s isch esoo, mer hänn en doo und anders au.
Miir hänn Glaischter, Dääfi, Schoggi, Guufekissi, Kulli, Cocci,
Roosegränz und spitzebsetzti Waar fir d Frau.
Fir iire Brief isch d Reegle die: Nomool e Nimmerli go zie!
Und wenn si draa sinn – s isch jo glyy – denn wäärfe si dää dusse yy!"