Melodie: Ich bin ein Schweizer Knabe ...
Miir sinn drei VKB-ler vo altem Schroot und Koorn.
Miir hänn am Fasnachtsmändig glyy aine uff em Hoorn.
Und sinn mer no soo voll und blau,
miir drummle nie mit ere Frau.
Denn mir sinn VKB-ler vo geschtert … nit vo moorn.

Melodie: Die Gedanken sind frei …
Dr Michael isch frei,
kai Mentsch kaa s begryffe.
Sy Schuld, schwäär wie Blei,
längt nit zem en schlyffe.
Doo z Basel het Aine,
unschuldig, wie kaine,
mit dr Grächtigkait Päch.
Gäll Guido A. Zäch.

Melodie: Min Vatter ischt en Appezeller …
My Vadder sait d Groupe Mutuel
syyg d Granggekasse woo-n-äär well.
Die wuurdi d Prämie soo bemässe,
dass d statt em Kääs muesch d Däller frässe.

Melodie: ’S Ramseyers wei go grase ...
Dr Ospel isch uff Wo-o-ollerau
mit syyner Friindin o-o-oder Frau.
Äär maint daas syygi bsunders schlau,
wie alli andere-n-au.
Fidiri, fidira, fidirulalalala,
Stüüre zahle-n-isch nyt fir dää aarmi, aarmi Maa.
Sunscht fäält em, und daas wäär doch fies,
no s Gäld für syy Schnääbelibryys.

Melodie: ’S isch äbe e Mönsch uf Ärde ...
Wott hitte-n-e Mentsch uff Äärde - raucht äär no?
Chemiearbeiter wäärde - muess äär s loo.
D Novartis wott s in Zuekunft soo:
Wäär rauche will muess uuse goo.
Derbyy stoht in dr Bible:
Muesch s Ungrutt brenne loo!

Melodie: Siibe kuugelerundi Söi ...
Dr Waagefiehrer Haiggi Hayer
sträält und schniigled sich im Zwaier.
Ganz e Scheene-n-isch dää Maa.
S het bald im Dram e Kamera.

Dr Waagefiehrer Haiggi Hayer
funggt dr Laitstell uus sym Zwaier,
dass äär voor Angscht nimm faahre kaa.
S haig e Combino hindedraa.

Melodie: Miir fahre mit dr SBB ...
Miir fahre mit dr SBB in s Griene ohni Rauch.
Wenn ab und zue dr Stroom ussfallt, steehn d Ziig au z’mitts im Lauch.
Und fäält denn no em Ha-Ma-Tschu dr Dampf, wie jeede waiss,
wintsche miir e gueti Rais – ab uff s Abstellglais.

Melodie: Die alten Strassen noch …
Scheen isch dr Minschterblatz,
lääbig dr Clarablatz,
verdraimt isch an dr Mäss, dr Petersblatz.
Wiescht isch dr Bahnhoofblatz,
wichtig dr Banggeblatz
dr iiberflissigscht «Platz» – isch by dr BaZ.

Melodie: Weisst Du wieviel Sternlein stehen ...
Will schyynts d Fan in Belgrad unde
randaliere, s isch e Hohn,
spiilt dr FCB e Runde
in däm lääre Stadion.
Soo-n-e Match isch ussergweehnlig,
sait dr Zubi cool im Gool.
Aaber ains stimmt mii verseehnlig:
Soo goot s GC jeedes Mool.

Melodie: Waas sinn daas fir gääli Veegeli …
Hänn Si gwisst, d Frau Zanolari präsidiert nimm d SVP?
Syt s e Stallpflicht git fir Hiehner hänn miir sii nimm dusse gseeh.

Melodie: Solothurnerlied ...
Dr Bischof Koch vo Solothurn het Lämbbe in sym Ryych,
s isch immer e soo gsii, s isch immer e soo gsii.
Si mache nit, waas äär befiilt, in d Kiirche geehn si glyych,
s isch immer e soo, immer e soo gsii.
Wenn die Zwai nit noochegänn, wänn miir das nit verstoo.
Me het ys scho im Kindsgi glehrt, dr Gschyyderi git noo.
Miir hätte no e glaine Typ, s verliert au kain derbyy:
Dr Sabo kennt em Koch – sy Keechin syy.

Melodie: Dr Sidi Abdel Assar vo El Hama ...
Zum Schnitzelbangg doo gheere gueti Helge
Und die woo druff sinn dien nit numme schwelge.
Miir wääre drotzdäm froh,
Si wuurde daas verstoo
und uns in Friide wiider uuse loo.