Jetz mach is bekannt, dr ganze Wält,
yych schnitzelbänggle nur no geege Gäld.
und han y gnue Stütz, no gang y denn au,
wie alli Andere - uff Wollerau!

An dr WM do hätte doch d Schwoobe so gärn,
e Wiiderholig wie friener vom Wunder vo Bärn.
Für d Gool sorge dr Ballack und dr Kloose
und fir s Wunder dr Pabscht in de Sepplhoose!

Friener han y vom Böbberle-Spiile nie gnueg kenne griege,
y ha my gfrait, wenns amme ghaisse het, ass alli Elifante fliege.
Gseen Si aber e Bääse duurefliege no wisse Si jetz,
das isch kai Elifant – das isch d Frau Fetz!

Wenn y mir vorstell, es kunnt ain und lipft dr Huet,
mit dr Pistoole in dr Hand und sait Gäld oder Bluet,
no han yych myyni Hoose gstriche voll
und zaal lieber em Guy Morin dr Stroossezoll!

E so wie me d Saskia mit em Moppert het gmobbt,
het men au my Frau in dr Buude bloggt und gfobbt:
Mit eme Maa wien ych, do miech me kai staat,
derbyy hän mir Bänggler doch au e Millieu-Mandat!

Friener het e Raiber fir en aifache Raub,
eppe 10 Joor Gfängnis gfasst – mit Verlaub!
Hit gnaagsch wägere Parggbuess, s isch e Fluech,
fir dr Räscht vom Lääben am Hungerduech!

Hän Si e Raizbloose wird Iine dr Doggder empfoole,
bin ere schwache Erektion geen Si Viagra go hoole
und hän Si Broblem mit em Stuel, mien Si sowisoo,
in d Sprächstund vo dr Barbara Schneider goo!

Vor 5 Joor hämmer uns mit würggen und steene,
an Begriff: „SWISSAIR-Grounding“ miesse gweene
und heer y dr SBB-Weibel, dängg y an dää Begriff:
„d Ratte verleen als Eerschti s singgende Schiff!“

Vor em Bundeshuus frogt dr Chinees Yang Yudio,
wo isch em Toni Blunnel si Buuleladio?
Do maint dr Couchepin underem Yygangsbooge:
Sie müssen den Blochel odel den Maulel go flooge!!

Y find das guet, ass jetz alli wisse
dass au d Credit Suisse duet Säägel hisse,
no fallts nid so uff, wenn die bim strande,
drotz Grübel no bi dr UBS dien lande!

Y ha fir dr Vosseler in circa 1000 Stunde,
e quadratisch waggsende Baumstamm erfunde.
S git’s fascht kai Abfall und er fuult nid im Rääge
und dr Clou isch, es git kai Fiinstaub bim sääge!

Y bi schampar stolz uff das Schwyzergryzfotteli,
doch die wo druff ummesteen, gseen uus wie 8 Dotteli
und lueg y gnau aane, no duet’s mii soo quääle,
wel dr Huggel und baidi Yakin fääle!

In unserer Milchstrooss haigs e schwarzes Looch,
das suugt alles iine, s isch soo brait und soo hooch.
Drum isch mir jetz glaar, wenns z Bärn e mool windet,
wo aane unsere Stutz verschwindet!

Wenn Ritter, Dood und Deyfel ummegaloppiere
und d Pescht und d Cholera duet grassiere
und s denne no Päch und Schwääfel räägnet,
denn het dr Bischof Koch dr Sabo gsäägnet!

In dr Politik und dr Wirtschaft isch e soo,
wenn ain d Wooret sait, no muess er goo.
Au ych ha jetz d Wooret gsait und due si verloo,
und wenn si wänn, bin y s nägscht Joor wiider doo!