Dr Johannes Paul het im Himmel e schöne Egge
Dört högglet är und duet als d' Ängeli verschregge
Well am Oobe duet är dääne himmlische Wääse
Vor em Iischloofe no us dr BAZ vorlääse
D' Ängeli zugge als zämme und gyggse verstöört:
Händ iir wiider s' Neuscht vo Röschenz ghöört ?

D' Wahl vom Benedikt het d' Masse duuregschüttlet
"Wir sind Papst" het d' Bild - Zytig breitspuurig titlet
Übersetzt heisst das - ganz eifach und klar
D‘ Schwoobe sin ohni Sünd und unfählbar
Drum frogsch Du Dii, mit guetem Grund
Ob dr Zäch au usem Schwoobeland kunnt

Fremdsprooche find ych sit minere Jugend e Hit
Drum mach ych irrsinnig gärn an Sproochkürs mit
Letschti kumm y heim von ere Oobelektion
Luegt mi die Alti aa - sait ime stränge Ton
Was isch bassiert - wär het Di so gschlaage ?
He mir hänn glehrt uff Türkisch Aadie saage

Aadie Schorsch vom Haafebeggi zwai
Gli hesch Du meh Zyt für dini Alt dehai
Ych hätt e Wunsch, wenn ych Di drum dörft bätte
Zeig au em Murat wie me richtig zrugg duet drätte

Hesch e chli Münz, denn syyg eso guet
Legg das doch bitte doo in dä Huet
S' isch alles für ganz e guete Zwägg
Am Beschte gisch grad e Nöötli wäg
Bi Baarzaahlig duet e Rabatt dinne ligge
Dr Erlös duen y em Ospel uff Wollerau schigge

Gopferdelli het lut mi Doggter gfluecht
Er het mi vo oobe bis unde untersuecht
Iir Fuudi isch kaputt, dien si das nid spüüre
Das luegt jo wie das vom von Rohr unde füüre"
Was hänn syy denn gmacht, frogt är mi gschoggt
Y bi in dr Stadt vor e Baiz uff e Blastiggstuel ghoggt

Was ihr hüt do sehnd, äs duet mr leid
Isch e Double vo mir im gliiche Kleid
Ych bänggle do nid, miends nid persöönlig näh
Das isch halt jetzt eso, das kas emol gäh
Entschiiede han ych mi vor zwei Stunde
Ych sing mini Bängg in Marseille unde

Mis Hiehnervolgg het dä Herbscht nid könne gniesse
Ab 2. November het‘ s in Garantääne miesse
Bis Mitti Dezämber het unse Bundesroot verfiegt
Wüsse die so genau, wenn me d' Vogelgrippe griegt ?
Das Datum het en andere Grund, do leggsch en Ei
Dr Herr Couchepin fiirt d’Wiehnacht halt au gärn dähei

Dass d' CIA bi uns duet lande
Han ych vo Aafang a guet verstande
Schliesslig isch doch d' Schwyz neutral
Und drum für das schlicht ideal
Numme bim Start begryff au ych denn nid
Worum nämme die Black und Blond nid mit ?

24 Millione bringt uns d'Fasnacht - dasch e Hit
25 koschtet d' EM - git eini Defizit
Dasch doch kei Sach - my Idee, die wird Euch gfalle
Die blitze mir doch zämme, mit ere Radarfalle
E Radar bim Goal, wo dr Zubi dinne stoot
Und hundert Stutz für jede won er iine loot

Dr Butler sait zum Charles: Please listen my chief
There is from Switzerland ein wichtig Brief
Swiss goverment writes you there is no way:
New conditions for künftig swiss holiday
Since your kürzlichen Verehelichung
You need here a Haltebewilligung

Dangg Red-Bull heb ych länger duure
Schieb mr als e Mars in d'Schuure
Drink Cola, Schwepps, iss Zweifelchips
Grieg vo Ueli-Bier mi Samschtigs-Schwipps
Diend jetzt nid so brüskiert Iir liebe Lüt
Ohni Schlyychwäärbig lauft nüt meh hüt