Der Summer het halt scho sy Raiz,
so gmietligg inere Stroosebaiz.
D'Stange und der Wurschtsalaat, schmegge phänomenaal
und dass der Stuel us Blaschdigg isch – isch miir doch schyssegaal.

D'Mamme het zem Hansli gsait:
"Syg lieb und lääb niemerem z'laid!
Bass mer uf em Haimwääg uff, em Vreeneli saisch nimm Pflutte,
und uff kai Fall duesch mer in der Pause mit Dirggebuebe schutte."

Der Ospel sait de Zircher: "tschau"!
Guet, sowyt verstand en au.
Är verduufted Richtig Wollerau – als wyttere Versuech,
uf der Flucht vo der Tamara – die well zuenem uf Bsuech.

Am Toni Brunner sym Buure-Radio
wird der Mischt digitaal uusegloo.
S lauft alles iber's Internet – jä wott ys dä veralbere?
S' fäält numme no, dass d'Kie im Stall, jetz virtuell mien kalbere.

D'Schwoobe entsoorge mit vyyl Gschigg
der Schröder im Altershaim "zem Blick".
Jetzt lyyt y em Herr Ringier aa und sag em: "si mer hänn,
au noe baar Settigi, wo mer nimme wänn."

Mer hänn zwor z'Ischtambul verloore
aber kämpfd hänn mer wie Gladiatoore!
Und worum die baide Yakin nit derbyy sin - waiss y jetzt:
Die hänn sich doch - us luter Schiss - dehaime scho verletzt...

Im Bintnerland do kunnt e Bäär,
als Asylant zem Veterinäär,
und losst sich pflääge, fietere, duet numme ummehange,
und woner sälber jaage sott – do isch er wiider gange.

"Blond und Black" ... z'vyyl Drägg ... ewägg !

Zem Gligg isch dä so schnäll ewägg
und der Helge wiider "black"!
Und wenn’s au nur e Fiidlen isch – paggt mi en Unbehaage,
als Karikaturischt riskiersch - dääwääg Kopf und Graage.

Wo’s im Vatikan bim Papschtroulett
der Benedetto droffe het,
schreye d'Schwoobe: "wir sind Papst!" Jetz goot’s dängg nimme lang,
denn herrscht fir d'Schwyzergarde z’Rom - e Lääderhoosezwang!

Die nei Blagette find y toll,
scheen gschtaltet - aifach wundervoll.
Kinschtlerisch gsee e groosse Wurf, jetz ziet me in Bedracht,
dass me sy uf's näggschte Joor – au unde fertig macht.

der Bischoff Koch staggelet: .."s ..soone Blamaasch,
dasch Sabo... Sabo... Sabotaasch!
Aine wo sait was er dänggt und derbyy mii hinderfroggt,
dä findet au no uuse, wo der Deifel wiirgglig hoggt."

Im Kindergaarte Blääsiring
maint Ain am Hoochdytsch-Häppening:
"Hastu Problem? Was soll das Scheiss? He Mann, ich voll korreckt!"
Im Grund gnoo isch es schaad firs Gäld – dää kaas jo scho perfeggt!

Wo d'Stadtbild-Komisioon hoochmotiviert
e Baugsuech fir e Mischtkiibel koordiniert,
mien si d'Entschaidig uuseschiebe, denn Aine draait no Runde:
der Delegiert vom VCS – dä het kai Parkblatz gfunde.