I lyd finanzielli Hölle-Quale,
due immer no z Basel Styre zahle,
au d Blächbolizischte hämmer rächt igschängt,
drum hett s nur no fir e Budget-Goschdym glängt.

Dr Charles mit dä super Ohre,
hett dr Camilla fir immer treui gschwohre,
und z England gits au scho e Wett,
me ka schätze wievyl Falte si hett.

Är blybi sicher no lang in Bärn,
di maischte haige in jo gärn,
bis jetzt haig är no kai Fähler gmacht,
jä au e Blocher träumt halt z Nacht.

Am Lauberhornstart hesch no alli Schwyzer gseh,
und denn lang, lang nimme meh,
erscht im Fryylig, denn aber laider,
bereits scho in dä Wanderklaider.

Si hüpfe, gummpe sin ganz wild,
«Wir sind Papst», schryybt e Titelbild,
ganz egal wie sie ybertribe,
fir mi wärde s immer Schwoobe blyybe.

Guete n obe Herr Vasella,
hänn si no me vo Basel wella,
s Härzstygg mit dr Mittlere-Brugg,
kunnt grad wider vom Behring zrugg.

Weder Muulkorbpflicht no Lainezwang,
nitzt bi beese Hiend efang,
drumm frog i mi, fromm frei und frisch,
ob dä Sabo ägscht e Pitbull isch.

S isch Wältberymt s Tiramisu,
fascht glych bekannt isch s Tamiflu,
und zem Gligg fliegt nit jede mit Grippe ins Bett,
wo sälber e bitz e Vogel hett.

E Reporter hett dr Huggel gfrogt,
wie Är sich sprochlig gege s Urteil wehre wott,
bis jetzt haig är no kai türkisch gnoh,
me ka sich jo au mit Händ und Fiess verstoh.

Au dr Elton John hett Hochzyt ka,
wär isch d Frau und wär dr Ma,
was me wais si sin nit arm,
und hänn nit nur im Summer warm.