Drei Daag offe! heisst die Zyt, wo d’Faasnacht uns beehrt.
Und offe isch dr Baanhoof au, wie sich das brav gheert.
Sogar go shoppe ka me in dr Stadt bis dieff in d’Nacht.
Nur wenn de eine wottsch go zie hett d'Beiz Fyyroobe gmacht.

Mit Kampfhind ischs e soone Sach. E Muulkoorb wär nid schlächt.
Denn wär's vyyl sichrer in der Stadt. Das wär glaub allne rächt.
Derbyy kenntsch mit de scharfe Hind au eppis Sinnvolls mache:
Si kennte unsers Nati-Team bi Länderspiil bewache.

Sanitätsdepartement - das sind no Zyte gsy.
Dr Conti hett's modärnisiert, e neie Namme gää.
Denn hitte nennt mes Gsundheitsdep. Nainai, das isch scho guet,
dass s'Ressort jetzt so heisse sett, wie dää, wos laite duet.

D'Gsundheitskeschte styyge wild, dr Conti losst uns zaale.
In Noochbersländer heisst's nur mild: Mais oui, c'est cher à Bâle.
Ai Leesig wär zwoor raadikal, ych maint, es däät sich loone:
Es gienge alli grangge Lyt uff Wollerau goo woone.

Ganz Baasel rennt, s'isch Maarathon. Mir sin au voll derbyy.
Syt dr Schild so spoortlig isch, tschogge mir am Ryy.
Doch ains vergysisch bitte nid, Wennd gweer dur d'Stadt duesch flitze:
Dr Zytrekord wird aberkannt, wenn d’Blächpolizei duet blitze.

Syt neuschtem goot's jetz rauchfrei loos, es frait nid alli glyych.
E Blägg Aut hett’s als Zuegoob gää, ei 'S' stoot glaub fir 'schlyych'.
Dr Schuldigi isch schnäll entdeggt, muss d'Laitig do bekenne.
Pass uff! Dr Hamatschu isch gweggt, kunnt zrugg zum Staat go penne.

Fraue in dr Politigg: Ei, das isch so guet.
Glyychberächtigung - dr Hitt! Oh wie guet das tuet.
Fraue gheere iibral hii, fir d'SP isch das glaar.
Nur uff de APG-Plakat heisst neischtens: Tschador aa!

Dä Väärs empert d'Fanatiker, si bloose zur Attagge:
Si verbrenne – s’schtert uns nid - e Baaselbieter Flagge.

In Dytschland hänn si gwäält. Ganz rächt: E Frau sitzt jetzt am Styyr.
D'Männer dängge: Das isch schlächt. Das kunnt is mein-i dyyr.
Tatsächligg wandre vyyli uss. Sie zien zu uns! Ojee!
Si fyyle sich ganz wie Dihai. Au Aldi gitt's wie mee.

Si baue si - si baue nid. Me ka sich nid entschaide.
Dr Umwältschutz schwätzt au no mit. Und allne schyynt's z'verlaide.
Jetz baued doch die Strooss fir uns! Was machsch e suure Stai?
Uf dääre Strooss, das wäär mi Wunsch, geen d’Schwoobe schnäller hai.

In Franggryych iiberaall Krawall, me hett's im Radio gheert.
Si zinde iri Kääre-n-a, dr Jacques findt’s unerheert!
Bi uns, es isch e grosses Gligg, wär’s gar nie so wytt ko:
Die wurde – d’Pisastudie zaigt’s - s’Wort ¨Abschuum¨ nid verstoo.

S'Theater koscht' e Haidegäld. Es goot um zig Millioone.
Derfir bringt's uns die ganzi Wält. Me maint, das däät sich loone.
Jetz stryycht dr Staat e huffe Stutz. Das isch au nid dernääbe.
Denn s'greescht Theater ka me eh im Grosse Root erlääbe.

Und s'scheenschte dra - das nääbebyy - es blyybt bis zue de Waale:
Fir die gar iibli Komedy muesch nid mol Yydritt zaale!

Grounding heisst dä neui Film. Är zeigt’s uns allne rächt:
Dr Gueti isch dr Corti gsy, dr Oschpel, dä isch schlächt.
Dass d’Swissair dozumool hett miese flach am Boode blyybe,
Ligt dra dass d’Fluugi denne scho ar Vogelgrippe lyyde.

Was isch mit unsre Spoortler loos? Die schwinge oben uss!!??
Und gwinnt dr Roger, hyylt är bloos. Mir kömme nümme druss.
Au kulturell isch’s desolaat. Es macht uns feermlig wee,
Wenn’d dehaim zur Prime Time muesch e Von-Rohr-Fuudi gseh!

Ä Helge hänn mir kain fir daas - mir wisse wie das kunnt:
Fir d’Fundis isch’s ä "Haide Gspass", Bootschafte brenne z'Grund.
Nestlé het grad reagiert und bringt, Hopp-Eins-Zwai-Drei,
Wäärbepooschter mit em Spruch: ¨Die Milch isch Däne-frei!¨

"Nai ganz im äärnscht, Das isch e Schitt!" Han ich zum Tschortschi gsait.
"Guantaanamo - das goot so nid!" Är het kurz iiberlait.
Druffaabe het er gsait - "okay!" Het äfflimäässig glaache.
"Miä lend jo d'Menscherächt jetzt eh z'Rumänie iiberwache.

Dr Sytesprung isch billiger für Männer, oh so scheen,
Sytt si fürs Verhieterli in Büdsche-Migros geen.
Doch driiberabe isch es no politisch voll okei,
Wenn’d fir dä Sprung in Schuppe goosch vom Maa vor Saskia Frei

Im Wahlkampf gheert me neui Töön, es isch dr letschti Schrei!
Dr Moppert gitt dir aine uss, scho wääle d’Freier Frei.
Das läängt nid - und dr Hanspi kunnt. E Ma mit kaine Kante.
Mir Baasler sind halt doch e Volgg vo prüüde Protestante.