Scho s fimft Mool foot dr Schugger Wirz e Buessezeedel aa,
und wiider schryybt är Parggverbott mit CK und zwai H.
Jetzt flippt är uss, gheit s Zygs in d Luft, do sait dr Schugger Lutz:
Ai Kulli, fimf Bapyyr im Graas – das koschtet fuffzig Stutz!

Dr Marcel Ospel iiberleggt: E 2 daarf doo nit dryy,
sunscht goot au 3 nit mit em 8 und 5 daarf linggs nit syy.
Jetzt hänggt s mir uss, das bleede Spiil, Sudoku gfallt mer nit,
will s nit wie myni Styyrabrächnig «0 – 0 – 0» ergitt.

Im Nationalpargg wanderet dr Basler Bischoff Koch,
bis bletzligg sälle Bär uffgryyzt – oh Gott! Der läbt ja noch!
Dr Bischoff rieft in syynre Angscht: An mir isch nit vyyl draa,
doch z Röschenz het s vyyl schwarzi Schooff, kasch die zem Frässe haa!

S Hildy, das vo Hölschte, schreyt: He näi – ych glaub ych spinn!
Du Max, was machsch du mit de Hüehner i mym Büro drinn? –
Uf Vyyre prüefe wott y se, die grosse und die chlyyne –
nur göhn die chäibe Vyycher nit ins PC-Laufwärch yyne!

Wo z Bäärn dr Schmid e Voogelschwarm am Himmel hoch erbliggt,
grieggt är verdeggel Schiss, eb ihn die Vogelgrippe zwiggt.
Kai Panigg, sait dr Couchepin flott, das leese mir in Rue,
wie bi de CIA-Flugzyyg: Machsch aifach d Auge zue.

Wenn d gheere wotsch zem Baasler Daig, denn sottsch e Schoosshund haa.
Eb gross, eb glai, eb digg isch glyych, wenn dä nur bälle kaa.
D Frau Esther G. het iire Ces – pardon, sii het en ghaa!
Derfiir läbt dä vom Gigi Oe. – dä haisst schyynts Edelmaa.

S liggt ain bim Psycholog und sait: Fir mii zellt nur dr Gwinn.
Schon wiider dausig Lyt entloo, nur so macht s Lääbe Sinn.
Jetzt bloggt mii numme ai Brobleem, wäg sällem bi-n-ych doo:
Was mach ych nur, wenn s kain me git, wo-n-ych no ka entloo?!

An Grugge und im Byschama gsehsch ain s Spital verloo.
Dä Gligglig het grad letschti Nacht zwai neyi Ärm bikoo.
Für s rächti Bai, wo jetz no fäält, het iin dr Doggter gschiggt,
denn s wärde Zeeche, Fiess und Bai nur no in Ziiri gfliggt.

Dr Huggel het sy Hirni schyynts im Hotelzimmer gloo
und z Istanbul nur aimool ginggt – scho het är d Stroof bikoo.
Vyyl gscheiter macht das d FDP, jä ,Beni, lueg guet hii,
die gingge alli d Saskia Frei – nur dert isch s kaine gsii!

Dr Matthias duet fescht daibele, dr Edy – mai, dä bysst,
d Angela pfätzt dr Franz, will dä se an de-n-Oore rysst.
Wo s d Mamme gseet, rieft si: Jä nai, das git e Strooffaggtion!
Nai, Mammi, waisch mir spiile nur – «Grosse Koalition».

Es sait dr Peter Malama, dr Scheff vom Gwäärbverband,
Ass du nit gweelt bisch, Saskia Frei, das isch e Riiseschand.
Dr Hanspi Gass kennt sich drumm nur im Stadttheater uss,
doch du kunnsch dangg dym Ehemaa – sogar im «Gwäärb» no druss.

S het uns dr Schugger vor dr Diir ganz grausig zämmegstutzt!
Sythäär hänn mir zwai volli Stund am Goschdyym umme butzt.
Jetzt hoffe mir, ass alles glappt und jo nyt abverheit.
Mir griege drum e Buess, wenn nur ai Räppli aabe gheit!