Doo hani welle e Karikatuur vom Blocher bringe,
aber bim Blocher kasch guet ooni Helge singe,
dä isch, saag ych - der Schuuflebuur -
scho in Natuur e Karikatuur!

Buurereegle:
Mer vermyyde soo - s koscht erscht no nyt -
der näggscht Karikatuure-Strytt.

Ich bi der Doggter Guido Zäch,
wär mii nit kennt, dä het halt Bäch...
kann machen, dass die Lahmen gehn
und d Spänder s Gäld nie wieder sehn!

Buurereegle:
Spändet fir e guete Zwägg!
Gänds em Zäch und s Gäld isch wägg.

Z Basel kaame wiider woone.
Es git scho so Begeegnigzoone,
dert kasch gratis s Wisse meere:
kaschTürkisch und Albanisch leere.

 Buurereegle:
Und d Binggis leere - das isch cool -
Hauch-Deutsch in der Heefelischuul..

Was mache mer au mit em Bundesroot?
Man steggt sie in ein rundes Boot...
und setzt si uus...” - nur wurds nyt nitze:
im Schwimme sinn die alli Spitze.

 Buurereegle:
Der Blocher nimmt, s het all’s syy Zwägg,
em Leuebärger der Schnorchel wägg.

„Wa‘sch der Unterschiid?“ froggt der Toni der Tino
„zwischem Murat Yakin und em Combino?“
„Dasch ghupft wie gsprunge - aagleggt wie blutt -
s isch immer ebbis Neys kabutt!“

 Buurereegle:
Baidi hänn, doo hämmer s Gschängg,
e Schruube lugg und Schlotterglängg.

Das isch kai Pit Bull, das isch myy Daggel,
dää stoht an mer uffe, doo saag ych: „Du Laggel,
jetz heer uff bättle und haus ab mym Fuess,
wär z Basel bättlet griegt fuffzig Stutz Buess!”

 Buurereegle:
Fir hundert Stutz isch inbegriffe:
Kasch gratis in e Egge schiffe!

D Frau Behring fiehrt, nur so zem Gspass,
en Haute Couture-Läädeli an der Petersgass.
Dert duet si, heerschs d Spatze vo de Dächer graaie,
ihrem Alte die quergstraifte Gwändli naaie.

 Buurereegle:
Der Behring maint nur: “Gottseidangg,
wenigschtens macht quergstraift schlangg.”

Z Basel herrscht jetz Uffbruchstimmig,
der Lewin lächlet nimm so grimmig,
der Joggeli-Raase blieht und grient...
... mit was hänn mir die BaZ verdient?

 Buurereegle:
Im Altershaim schwärmt s Hildeli:
„Nur Iiberschrift und Bildeli.“

Jetz wo d Aktie wiider styyge
feen alli afoo Zaale byyge:
Ebner, Behring, Rey und - ach...
mir längts, wenn ych Sudoku mach!

 Buurereegle:
Gohts nit uff, mach nur kai Gschrey,
ains und ains git mänggmool drey.

E baar Schwyzer Forscher finde statt Eel
z Syyrie in der Wieschti e Riise-Kameel.
Aber s greescht Kameel, das lyychtet yy,
haisst Ogi und fahrt Variante-Schyy.

 Buurereegle:
Der Doggter h.c. Ogi kaa me
jetz heggschtens no bruuche als Camel-Regglaame.

Gescht bin ych uff d Boscht und ha mi verloffe,
vorbyy an... *) ... find ych ändlig e Schalter und fang afoo hoffe...
Ych wott e Margge kaufe, doo sait mer die Kueh:
„Si hänn s Nümmerli vergässe - dä Schalter blybt zue!“

 Buurereegle:
Wotsch dym Schatz per Brief ebbis brichte,
denn gits nur ains: muesch Briefduube zichte!

*) Schuuflebuur-Rap:
Ammedyssli, Barbie-Ditti, Gummibäärli, Kokosnüss,
Hueschtedääfi,Löffelbisquits, Naagelfyyle, Ryssverschlüss,
Powerbändli, Slip-Yylaage, Trillerpfyffe, Ohropax,
Vogelfuetter, Wattestääbli, Zahnpasta und Büggselaggs

Jetz het mi doch soone Bläächbolizischt
zem dritte Mool blitzt - e soone Mischt!
Jetz wänn si mer s Billjee ewägg nää - gaa-gaa ! -
derbyy bin ich nyynzig - und ha nie ains gha.

 Buurereegle:
Wotsch firs Alter e Bolschter haa:
Kauf e Blächpolizischt und fang sälber aa!