Dä Popscht, dä nej, dä Benedikt, mit synere Erfahrig,
Het sofort ebbis uuseglo zer Liebi und zer Paarig.
Ych hoff, dass d Lyt nit lose uf dä Schwoob und syni Lehre;
Es fählt jo numme, dass sich syni Landslyt no vermehre !

Amerika isch s Land vo unbegränzte Meegligkaite;
Drum losst dr Bush die Gfangene in ghaimi Lager laite.
Und wenn De mainsch, dass d Freihaits-Statue däne ihr Idol isch,
So muesch halt jetz begryffe, dass die Dame inne hohl isch.

Si sin in däm Amerika au Todesstrofvollstrecker;
Elektrisch und mit Spritzene bassiert s bim Schwarzenegger.
Und ai Methode hän die Brieder kirzlig nej entdeggt:
Do wird me denn im Wald vom Vicepresidänt erleggt !

Isch nit d Martina Hingis unsere allerliebschte Schatz:
Kum isch si zrugg im Tennis, gwinnt si wiider Satz um Satz.
Si schetzt, dass si so Setz ka mache, Si, das sag ych Ihne !
Und nie me mues e Setzli setze iber Wäschmaschine.

Em Berlusconi transplantiert me d Fryse, wo kabutt isch;
Die Gruuselhoor verrote aber, won er drfir blutt isch.
Do ka me in dr tyrschte Klinik au Millione bläche -
Wenn d Hoor usfalle, falle si – die lehn sich nit bestäche.

E Ranzelandig macht dr Hamatschudi efang ständig –
Si hän au bi dr SBB fir so ain kai Verwändig
Dass dä s bi Bahn und Tram nit bringt, hät ych ene kenne huuche:
Die Nase kasch doch nit emol als Waichehoogge bruuche !

Wenn nun der Schwabenkäfer seine Verse hochdeutsch singt,
Dann denkt man gwis, dass er sie für die Fremden eso bringt.
Man möchte eben auch als Schnitzelbangg verstande wärde;
Und das halt ganz besonders in de Basler Kindergärte.

S Theater mues jetz spare – s längt no knapp fir Unterhose;
Dr Don Giovanni kauft fir d Donna Anna Plastic-Rose.
Zem Personal yspare wänn sogar si um s Verworge
Dr Fascht-Diräggter Gass jetz in Regierigsrot entsorge.

Dr Huebere vom Bläsiring hänggt’s Aarschgwey bis an d Gney
Drum wott si’s Fuudi lifte loo, dass’s wider wird wie ney
„Frau Hueber“, sait dr Doggter, „Dasch kai Gwey wo do duet moodere
Die digge, dunggle Strich am Bai, das sin vergrampfti Oodere.“

Die lääre Bäch und See fehn is langsam afo schogge;
Dr Bodesee durchquert me näggschtens drogge in de Sogge.
Wo isch das Nass au aane ko? Mir bruuche halt e Huffe,
Syt alli Schwyzer Autofahrer nur no Wasser suffe!