My Namen isch Marcel, es goot mer so schlächt
Mues furt us dr Stadt, s isch mer niene rächt
D Kolläggde am Usgang, i saggs nume lyys
Fliesst vollumfänglig in Schnabelbryys

S längt grad no fir e Faschtewaaie
Und s Goschtyym duen i sälber naaie

Gell, Fritzli, du musst jetzt Hochdeutsch schwatzen
Sonscht kriegscht du im Kindsgi von mir auf die Tatzen
Jo, Fräulein Marti, ich habe begriffen
Ha welle go brünzle, jetz muss ich gehn schiffen

Syt er s Schnäbeli hochdütsch fiert
Ischt auch der Fritzli integriert

Wäg dere neue Tagesschau
Stand ich bim Ässe neuschtens au
Uf dr Strooss am Chuchitisch
Wo lenger als my Hütte isch

D Frau verriert zwar mängisch d Händ:
I gsee dy nümm am anderen Änd

Äi find däi Fryyse, läck, so häiss
Lächlet d Condoleezza Rice
And if you want, dear Angela
You can from me e Jupli ha

I hätt e Wunsch, Frau Rice, e chläine:
Ire Pitbush ghört an d Läine

Dr Bischof Koch, das Muschterlamm
Chocht vor luter Fruscht im Tram
Denn vor im fahrt dr Schofbock Sabo
Scho syt Wuche ohni Abo

Im Hotel Chrüz motzt e Röschänzer Trüppli
He, Choch, gits do nüt as Haferschlyymsüppli?

Wär stoot dört äne, wäreliwär
Dört änen am Bärgli stoot voll dr Bär
I schiess e Foti, dä luegt rueig zue
Dehäi rieft d Frau: Otti, dä Bär isch e Chue

Dr Augenarzt mäint unumwunde
Die Chue het dir e Bär ufbunde

Dr Daggel vom Herr D., dr Dres
Schlürft nur no Bouillon mit chly Chees
Syt d Medie d Hünd so arg verrysse
Grauts im panisch vor em Bysse

Dr Dres macht jetz Tai Chi
Sy Herr loot das lo sy

Wäisch, wies mir nach Schänge stinkt
Käi Zöllner me, wo frogt, gnäisst, winkt
Dr Gnuss dehäi am Gleesli Wysse
Isch halb so gross, wenn d nümm chasch bschysse

Aldi sei Dank darfsch hütt statt schmuggle
All die Yychaufseck häibuggle ...

Im Bahnhof z Basel stoot äin näb de Schiine
Em Gsicht a het er zimmli griine
E Kondi frogt en: Wär bisch denn du?
Dr Ha-, dr Ha-, dr Hamatschu

Als nöggschde Tschu-Tschu-Challenge wurds en räize
Bim Läufelfingerli dr Dampfchessel z häize

Dr Noldi X, e Gartezwärg
Wohnhaft am Fuess vom Nodlebärg
Zieht furt us Basel - und zwar haschtig
Hejo, dä arm Chäib isch us Plaschtig

Dr Noldi het entschlosse ghandlet:
Sich in e Züribär verwandlet ...

I ghören es Glöggli, das lütet so nätt
Dr Daag isch vergange, glyy gang ich ins Bett
Han i froh gsunge, s isch andersch choo
Denn gnau doo isch dr Zug blybe ...

Dr Peter Sauber säuslet: öö
Brucht d SBB au Michelin-Pneu?

Ach, diese Alternativmedizin
Mesdames, messieurs: so ein Spleen
Nie im Leben heilen Sie
Kollege Blocher mit Homoöpathie

Schmid Sämi säit, wenn d mi frogisch
Das düecht mi ganz kinesio-logisch!

Charles, i nimm di an den Ohre
Du hesch doch hooch und häilig gschwore
Hürootsch de Drache nid, schimpft d Queen
Jetz hämmer s ganz Johr Halloween

Froh zu sein bedarf es wenig
Doch eso, Frosch, wirsch nie König!

Was bring i myner Liebschte häi
Uf d Wienacht, ächt en Edelstäi?
Näi, nur s Tüürscht isch rächt fürs Liesel
I schänk em äi, zwäi Lyter Diesel

Es rieft, spar dir dä Spryt, bigott
Süscht bisch du gly schnitzelbankrott

Syt d Laiebühni „Bundesroot“
Dääglig live uf Sändig goot
Strahlt dr Blond znacht zum Black:
Ändli e Sitcom mit chly Dräck

I luegs nid fertig, wäisch i kenns
Nuuschelet dr Alder Jens

Z Turin isch nid ganz unerwartet
Au d Prominänz im Bobrun gstartet
Dr Held vo Rom, dr Silvio
Schloots bir erschte Kurve scho
Wäg übertribnem Kueveschmiire
Mit Absugfett vo Buuch und Bire
Dank Ghäimflugtipp vom CIA
Fliegt dr Bush erscht bi Rank drei
D Frau Angela am dütsche Schlitte
Brucht nach fünf Schritt e Pauseschnitte
Au dr Putin wirkt sackschlapp
Dä Lulatsch murggst dr Gashahn ab
Dr Blair stellts quer, im Chirac gots übel
Dr Pöbel facklet en bös ab am Hübel
Schloot jetz ächt d Stund vom Bundesbob:
Am Säil dr Moritz, allez, hopp
Denn Merz, Däiss, Schmid, Rey, Couchepain
Dr Chrischtoph, Brämser, grinst, hä, hä
Fertig, los, die sibe starte
Nur, dr sibt, dä cha nid warte
Är brämst voll – und kollegial
Braust d Mannschaft ohni Bob ins Tal
Ufem Buuch ins Zyl, äi Huffe
Dr Schlitte bumstätsch uf sen ufe
D Jury bschliesst: Micheline, ir Heere
Mir die euch läbeslänglig speere
I schnuuf lut uf, rief: Gottseidank
Doch läider isch alles nur e Schnitzelbank