Unsere Noochber, dää het Muet, der Guschti Buel,
dä hoggt im Gäärtli unde uff eme Blaschtigstuel.
Är winggt ys fröölig zue und rieft denn voller Stolz:
„Dasch nuur e glaine Tescht, moorn filz ain us Holz!“

Der Bundesroot het lämbbe hit im Sitzigszimmer,
die Strytterei nimmt kuum en Änd, es isch wie immer!
Wär was bikummt und kein wott zaale, d Laag isch schyter,
derbyy sott dää, wo d Pizza brocht het, ändlig wyter.

Jä d Saskia Frei isch schambbar muff uff iiren Alte,
will dää sy Nääbegschäft im Buff het welle bhalte.
Es haig jo schliesslig doch au Guets ghaa, het er gfunde,
die Stimme wo sy griegt het, sin vo syne Kunde!

Au diir händ allemaa die Saskia Frei nit gwäält.
Und do dä Malama, dä hät ys grad no gfäält.
Jetz stoot der Gass im Waalkampf schambbar unter Drugg,
denn villicht mäldet sich der Tschudi jo no zrugg!

Bald wäälsch d Regierig mit em Händy, das isch nei!
Wääl säggs moll säggs und drei mol drei drei drei drei drei.
Wenn d Voorwaal stimmt, regiert denn ebber, wo d kasch bruuche,
wenn nit, denn isch s so aini, wo halt nuur ka huuche.

In der Nöchi vo der Lange Erle unde
hän unseri Kinder ganz e maagers Vöögeli gfunde.
Sy hän s waarm yypaggt und denn haibrocht, doch herjee…
… gang mach däm aarme Martin Vosseler e Tee!

Mer sin do letschte Herbscht im Bündnerland uff d Pirsch.
und hän drei Gämsi gsee, ai Staibogg und e Hirsch.
Und bletzlig voor ys, Aug in Aug, mit Angscht und Bange,
e riise Bäär! Jä und denn isch er wider gange…

Mer bringe doo e Väärs mit Bild vom Dalai Lama,
denn dää lacht sälber gäärn und macht bestimmt kai Drama!