Jä Sii, d Chineese kömme friehner oder spöter,
das wär e Löösig byspylswyys für d Froog vom Köter!
Me könnt denn „s Johr vom Hund“ wie z China zelebriere
und jeede Pitbull „sweet and sour“ lo serviere!

Ain vom Gsundhaitsamt dä sait: diend nit vergässe,
vor em Zmorge Vogelgrippe-Pille z frässe.
Denn wäg däm Bundesroot in Bärn – dasch kai Vergniege –
wurdsch zwor kai Grippe - aber all Dag Vögel griege!

Fyyrlig sait dr Edelmaa zur Giggi Oeri:
Jetz han y gnueg als Bresidänt und dorum hör y
ändlig uff – do frooge miir ys under Fründe:
muess ain en Amt, won är nie ka het, wirgglig künde?

Do sait dr Gysi Max us Bämbel: “ Diir mer sette,
wenn miir wai d Gondelbahn und s Stadttheater rette,
die beede Biilljekassehüüsli fuusioniere:
sii drückche d Biillje uus und mir döi yykassiere! "

Wo miir dä alti Papscht - dr neu – in Rom sehn wingge:
Sii, wie dä aagleggt isch und wie sich dä duet schmingge!
Är gieng halt cool, maint näbedra e Paparazzi
an erschte Schwuule-Bibel-Dag als DJ Razzi!

… mir hänn kai Helge doderzue, mir dien s beduure!
Jä, s isch no haikel hütte mit Karikatuure!

Am zähni z Nacht isch ain in d Innerstadt ybooge
und het dr Ryssverschluss vom Jäggli uffezooge.
Do goht e Fänschter uff und zwai mit suure Gsichter
schreie: Lärmisiech, mir gsehn ys vor em Richter!

Nach em Hochzytsfescht mit syner alte Dante
isch dr Charles jetz nümm dr Wieschtscht vo de Verwandte.
Jä, wenn d das Paar verglyychsch, denn froggsch dy unverfroore:
wär isch dä nätt jung Heer mit däne schönen Ohre?

Do letschti gsehn mer, Sii, mer hänn das nit begriffe,
e Schugger lyycht nervös ins Imbergässli schiffe.
Är miess zum s Buesseziel z erraiche – s isch zum Schiesse –
sich amme kurz vor Arbetsschluss no sälber biesse!

D Frau Zanolari gitt scho ab, dasch sehr z beduure!
Ihren Ängelsbligg dä fählt ys, ihre suure!
Si hätt nit jetze scho – dasch schaad – zruggdrätte sotte,
ab näggscht Johr wärde Kampfhünd sowieso verbotte!

Jä d Stimmezahl liggt für d Frau Frei, mer mien ys wundere,
im e Beryych – mer maine: ehnder im en undere.
Doch s haige vyyl – mir hänn do Wählerforschig driibe –
an Basler Freisinn dänggt … und Armuetslischte gschriibe!

D Blinddärm z Basel und in Bärn nur d Hiehnerauge
und für e Räschte dät nur Züri öbbis tauge.
Sii welle Füüdle, Mage, Härz – das isch zum Lache,
die könne höggschtens jo us Zürcher Gschnätzlets mache!

Hab eine Schnuudernase, habe Schyss beim Glätteren,
kann keinen Burzelbaum, lass jede Balle tschätteren,
kann vom Znüni die Banane nonig schellen,
derfür kann ych s in Standardsprache do verzellen!

Sie will – er kann nicht, weil er müsste, wenn sie wollte.
Sie könnte dürfen, wenn er würde, wie er sollte.
Da plötzlig länggt es ihr – sie muss ihn abservieren,
drum tut in Deutschland Schroeder jetze nümm regieren!