Es schneielet, es beyeleret - es goot e scharfe Wind,
d Maitli die hän gar nüt aa, - drum laufe d Buebe gschwind!
Dr Jögge Schild vo Swiss Olympic guent, - und sait: "Y kauf
die Rodin-Dame als Regglaame - für dr Hürdelauf."

Die gueti Muetter Aerde kunnt - rasant in  d Wäggseljoor.
Si schwitzt  und tropft, het Wallige - und zimmli schütter Hoor.
D Frau Schneider boort se aa und froggt: Was duet di soo bedrugge?
He, wemme dir in d Falte sprützt – so foosch au afo zugge!

Im Herbscht het unser Parlamänt - in Flims e Waldhuus pachtet.
Die haige dört, so het me ghört, - vorallem übernachtet.
Au haige sy, uf unsri Köschte, - z Oobe köschtlig gässe;
und ai Mool sin 2 Bundesrööt - ans glyychi Dischli gsässe!

Dr Muusiggnuss im Muusigsaal - dä isch sit Joore gstört,
well me mänggmool s Hieschtele - vom Drämlifierer ghört;
jetz faart das Drämli wie dur Angge - Fädere sei Dangg,
doch wenn denn s neu Casino stoot, kunnts Dram nümm umme Rangg!

D Blocher-Dochter kauft e Huus - mit vyyle Siessigkeite;
dr Babbe grinst und gratuliert - syyner siesse Maite.
Mir bitte drumm:  Schigg d Läggerli - grad kilowyys im Babbe,
so stopfe mir mit "Basler Daig" - e groossi Zürcher-Klabbe!

My ainzig Kueh, sait ys e Buur, - wett an e Kunstuustellig,
si git in alle Farbe Milch, - isch au em Stier nümm gfellig;
dr Dierarzt het Urin abzapft, - sy Rächnig schiggt er morn,
und ych darf d Kueh nümm fuettere - mit Gras vom Lauberhorn

In vyyle Baize wird no hüt - d Hygiene gärn vergässe
das isch für Pilz und Schwoobekäfer - ganz e bsunder Frässe.
Grad kirzlig het e Källner gfroggt - het dä n ys welle schelle?
„Wär vo Euch am Fänsterdisch - het s Glas jetz suuber welle?“

E Gaissbogg als Masgottli ha, - isch doof und fascht fatal,
denn s Böggli isch e "sans papier" - und dorum illegal!
Es böggelet, isch boggig, stuur, - wird ständig numme stuurer,
Kai Wunder, denn dä armi Kaib - isch ständig umme Muurer!

Vyyl Schwyzer sin hüt XXL - und grad so lang wie breit,
die wäre guet fürs Fanprojäggt - die sin nit gwaltbereit,
me miesst e Mindeschtgwicht bestimme- s wär zwor öbbis lätz,
me hätti denn im Joggeli - no höggschtens tausig Plätz.

Si schwyyge, schwyyge, schwyyge, schwyyge - unsri Swissair-Manne;
dr Corti aber schnuurt und schnuurt - und haut e paar in d Pfanne.
Zwölf Millioone het er  griegt, - me sait em: die kasch bhalte,
doch wenn s haiss wird, muesch wie mir - aifach d Schnuure halte.

Dä Durm, dä arg verdrüllti, kasch - em Tamiflu verdangge,
das Mittel gege d Voogelgrippe - bringt e Huffe Frangge.
Dr Arzt het au de Arschiteggte - s Tamiflu verschriibe:
D Grippe isch ewäg zem Glügg - dr Voogel aber bliibe.