Es beebt, es zitteret und es gracht
und ganz Basel isch verwacht.
Do stuunt d Frau Schneider ganz verschreggt:
„Soviel han ich no nie beweggt!“

Im Irak duet d Sunne schogge.
S isch so haiss und eeländ drogge.
Nur dr Bush, hänn mir vernoo,
haig dert nassi Fiess bikoo.

In Basler Schuele geen Buddischte,
Jude, Muslims und au Grischte.
No ai, zwai Joor wird ney normiert
und d Schuel isch total reformiert.

Im Konzärt kasch s Piano gheere,
will d Drämmli dusse nimmi steere.
Die vom Bau sind stolz und froo
und händ grad d Bauschtell offe gloo.

As me Gaischterspiel so nennt,
het e Grund, wo jede kennt:
Dr FCB isch zwor no doo,
doch vom guete Gaischt verloo.

E Bsuech im Buff, das ganz in Eere,
darf me niemerem verweere.
Dr ainzig Grund, ass me dert stäggt,
liegt im staargge Triebhuuseffäggt.

Wänn mir aimool Färnsee glotze,
isch s Programm total zem Kotze.
Drum hämmer schnäll der Schalter drait
Und zem TV : „No deal“, gsait.

In Flims mien d Reet sech furchtbar quäle,
jede Daag mien sie dert wääle
und beschliesse mien sie zämme,
ob sie non e Cüpli nämme.

Mit Zircher wurde mir diniere,
sogar mit Schwoobe znacht soupiere
und bewirte unsri Find,
solang si kaini Raucher sind.

Mir begriffe nit, werum
gits nit s ney Polarium.
Mir hätte deert ganz dringend welle
dr letschti Gletscher yynestelle.

Dr Stoiber duet sit Joor regiere.
Jetzt darf är nimmi kandidiere.
D CSU het, wie de waisch,
iin ussortiert als Gammelflaisch.