Mir wänn eich warne händ ihr dehaim e Ball
Wenn ihr nit sicher sind denn lueged iberall
Dä muesch verstegge sunscht kennts no passiere
Dass d UEFA kunt und will abkassiere

Bi de Läggerli wird restrukturiert
Und dr Honig dä wird wägrationalisiert
Doch dass dä gspaart wird das kasch glatt vergässe
Dr Honig wärde d Blochers eifach sälber frässe

In ihrne Glyb dert kennes d Nati-Spiiler gniesse
Uf der Ersatzbangg kasch kai Penalty verschiesse
So viil Schwechi das isch schlimm nur dängge mir immer
Em Köbi Kuen zueloose das isch no viil schlimmer

Der Merz tuet rächne doch es will ihm nit rächt laufe
Wenn är Hoor hätt denn wuurd är si sich raufe
Ganz vergiftet schiebt är Zahle hin und här
Verglemmi das Sudoku hyt isch aber schwär

In Gänf lauft nyt nur d UNO het e Huus beleggt
S het sich in Bärn sit eh und je nit vyyl beweggt
D Dynamik z Zyyri die isch soowiesoo zem lache
Doch mir in Basel kenne Äärdbebe mache

Dä Schrott wo d Basler schutte das isch nit zem fasse
Sogar der Zubi wurd do wieder in d Mannschaft passe
D' Gigi Oeri schwitzt wel si sech tuet scheniere
Do wurde mir au in Parfym inwestiere.

Wel si d Märthalle nit hänn kenne miete
Wurde mir ihne d Iisarena biete
Dert isch s kalt und s isch greesser und au häller
Und der EHC spiilt soowisoo im Käller

Si dien mit Muusigvielfalt fir s Casino wärbe
Wäge dämm miesst das kai Riisekischte wärde
Mir faare Drämmli das isch genau so scheen
Und loose d Vielfalt vo de Händiklingelteen

Europäisch sinn si duss und mir sinn froo
Wel si an Usswärtsmätsch jo gar nimm kennte goo
Denn wie solle die nur fliege – das muesch gseh
Solang de kaini Fläsche mit an Bord kasch neh

Muesch als Boopscht fir dini Reed e Uuskumft ha
So lyyt doch schnell em neie 1818 aa
Denn wennd drnäbe längsch – was ab und zue passiert
Isch wenigstens scho d Fyyrweer alarmiert

Jetzt het d Frau Sarasin au e so ne Kaare
Wo si mit Vierzigdenner Aug in Aug ka faare
Doch wo si stoo blibt hyylt si wie ne Hund
Wel ohni Schäämeli si nid uuse kund.