De kaasch di hit uff Frinde aifach nimm verloo
Gescht no umaarmt – hitte stoosch ganz ainsaam doo
Zeerscht bisch dr diggscht Koleeg, drufaabe leen si di im Rääge stoo
So het jetz au dr Bush dr Saddam hängge loo.

Zer Zyt do gheersch jo iiberaal vo so Casinos
S Géant-Casino und daas vom Bond im Kino
Am Fluugblatz het s scho ains, daas vo dr Hadid sell an Baarfi koo
Und bi dr Schneider frogsch di: "Wie lang ka si no?"

Wo dr Bush s Angie massiert – so nooch am Hals
Het är 'Lewinsky' dänggt und gmaint, jo iire gfall s
Doch si zuggt zämme und gumpt uff, si waiss genau, das kunnt nit guet:
Wo dä d Finger dinn het, fliesst drufaabe Bluet.

Dr Housi wott vo Bäärn dr Voogel Gryff go bsueche
Äär verlaufft sich, landet bi de Demo-Rueche
„I ha dä Gryyff nid ganz begriffe“, maint dehaim dä Bäärner Maa,
„Doch die wiude Manne hei e Vogu ghaa!“

In dr Schwiz do stoot s um d Glyychstellig saggschlächt
D Fraue hänn kuum Macht, dr SVP isch s rächt
In dr ganze Schwiz? Nai, ai Stadt laischtet Wiiderschtand dergeege
Z Baasel kaa ai Frau die ganzi Stadt biweege.

Mir hänn am dreiezwanzigschte Dezämber welle
No schnäll in Schoorts und Tii-Schöört Wienachtsgschänggli bschtelle
S isch nit am Kliima glääge, dass de fascht hesch blutt kenne go boschte
S isch wil uns d’Baasler Styyre s letschte Hemmli koschte.

Em Pingu lauffe d Drääne – äär het Depressione
Wil är jetz nit in das Polarium deerf go woone
Doch d Schwizer Demograate saage: „S het scho z vyyl Ussländer doo,
Me mues nit no e Huus fir d Pole baue loo!“

Dr Bäär Bruno isch – mir kenne s nit verschtoo,
freiwillig vo Italie zu de Schwoobe koo.
Doch scho noch kurzer Zyt deert wird är depressiv – losst sich verschiesse
Jo, bi däm Gammel-Flaisch kasch s Lääbe nimmi gniesse.

Dr Bruno het in Bayern welle 'Weisswurscht' gniesse
Wil är kai Bass het, dien en die deert grad verschiesse
Das Vorgoo schiint zwoor bitzli haart, doch in dr Schwiz kennt s noodisnoo
Mit den SVP-Asylgsetz au so koo.

Wo d Äärde gwagglet het, hänn miir scho afo hoffe
Dass es denn nit so schlimm gsi isch, das het uns droffe
Jetz heeret joo nit uff mit boore - mir bitten eich do drumm
Denn gheit vilicht dä gruusig Mässduurm äntlig um.

Wil me Kulturguet nit ins Ussland deerf verkauffe
Mien d Himmelsschiibe-Dieb im Gfängnis ummelauffe
„Das gilt fir alli gliich!“, sait d Bolizei, „es mues jetz äntlig glappe,
Dass mer d Frau Blocher mool mit Läggerli dien schnappe!“

S git kaini Risike, es kaa au nyt passiere
S isch gaar nit gfeerlig, also leen si s uns brobiere
Das sait nit d Schneidere vo iirer tolle Geotherm-Ydee
Das sinn die alte Fans vo neie AKW.

Dääne Juude goot s doch immer nur um s Gäld
Und Genozid het s kaini gää uf dääre Wält
Jugos mugge, Nääger stingge, Asylante sett me jaage
Dr Blocher mecht das wider ungstrooft deerfe saage.

Ob Schwyyge Gold isch, jä do kaa me driiber stritte
Und dass dr Corti Silber reedet, Sii, nai bitte!
Statt däm Schwyyge und däm Reede, kennt s uns allne ebbis bringe
Wenn die wo aaklaggt sinn jetz äntlig dääte singe.

Mir mien si frooge, sinn Sii baraad zem stäärbe?
Denn im ne Mooned gits vo Baasel nur no Schäärbe
S tapfre Schneiderli mecht Heldin wäärde und nit druff verzichte
Meer als „Siibe uf ai Straich“ kenne z vernichte.