Ych bi bim Psychiater gsi, amene schööne Moorge
und ha ihm alles verzellt, vo myyne Soorge
denn sait äär, wony ändlig fertig haa
verzell Du das im Fäärimaa

Myy Fuessballhärz hett letscht Saison glitte
Züüri Maischter – Dütschland Dritte
aaber, zwai Liechtbligg hänn mir – y sings no gäärn
dr Murat hett uffghöört und dr Hakan isch z’Bäärn

Doo beschwäärt sich dr Pabscht Benedikt – vormals „Ratz“
myyny Klaider sinn z’gross – ’s hätt no e Bischoff drinn Platz
y gseh jo uss wie e Baby, dasch au no gemain
soo adoptiert my d’Madonna, aber nit die wony main

Mit mym Brueder grieg y mänggmool fascht no Grach
y haa no nie könne gwinne geege ihn, im Schach
do macht äär ändlig e Fähler, dr Momänt isch doo
und denn – denn isch das Äärdbeebe koo

Wo aber d’Äärde denn wiederhoolt vibriert
hett d’Gigi Oeri im Christian Gross telefoniert
„Es wackelt ganz Basel, blyyb Duu nur cool
des isch nit nuur Dyyn Trainerstuhl“

Im Arslan Dürüm entwyycht e Fluech
und äär sait zem Gül, nach em Night-Club-Bsuech
am Sunntigmoorge, e Bitz verschreggt
wenn y numme no wüsst, woo my Mässer steggt

Dr Floyd Landys hett miesse – das kaa au ihm bassiere
nach dr Tour-de-France lo e Zahn plombiere
doo maint äär uff d’Froog, ebb äär miess e Sprützy haa
(joo) uff no ainy mehr kunnts jetz au nümm druff aa

Dr Pluto, dää zellt schyynts nümm als Planeet
am Himmel isch äär aigentlig obsoleet
drum wyyse sie z’Ängland dr Zuuby in d’Schrangge
loss doch dää Pluto in Rueh, bi de hooche Flangge

Zerscht bin y knapp im ene Puma ussgwiche
scho hett sich vo hinde e Krokodil aagschliche
denn haa my zwai Stund lang mit eme Reebock grauft
aber denn han y das Lyybli vo Adidas kauft

Unsere Drämmlifiehrer gohts an Graage
sie mien alles könne au uff Änglisch saage
mänggmool könntsch maine, es syygy für d’Katz
wenn aine frogt: Hey Mann, kasch Du saage, wo Claraplatz?

Sie hänn ungeniert an d’Hüüser brunzt
und hänn derzue no zfriede grunzt
drumm erwäggt me für d’EM im Fuessballverband
für jeede Saustall e Groosslyynwand

Uff em Standesamt, so zimmlig am Schluss
frogt dr –minu ihre Maa, nach eme innige Kuss
wotsch Duu esoo ans Hochzytsässe
Duu hesch dehaim Dyny Zeen vergässe

Wenn De nit waisch und nit vyyl wotsch dängge
kaasch jeederzyt Basler Läggerli schängge
es isch für jeedes Portmonee öbbis derbyy
s’muess jo nit grad die ganzi Firma syy