Was duet dää Blocher immer wiider ummenander mùùre,
nit numme iiber Afrika het äär e frächi Schnùùre.
Dää sell sich syyni Kommentäär ändlig emool schängge,
und nit immer saage, was die maischte wiirgglig dängge!

Hillary for President, der Billy sait das au,
äär kennt das Amt us syynere Zytt, drum hilft äär jetz der Frau.
Im Oval Office rieft ganz lyyslig d Lewinsky Monica:
«Hillary, yych lueg denn wiider zue dyym liebe Maa.»

Im Saal vom Groosse Root sinn vyyl mee dusse anstatt dinne,
der Presidänt vom Parlamänt duet sich hintersinne,
derbyy kaa d Politik uff däm Wääg sicher numme gwinne,
sinn si nämmlig dusse, dien si dinne nit so spinne.

Bi zää vo dausig Zircher Buschi, doo stuunt me wyt und brait,
isch d Befruchtig kinschtlig gsii, het e Studie gsait.
Miir sinn sicher, dass das stimmt, der Grund isch aifach dää:
Uff ganz normaalem Wääg , doo wùùrds die Dùùble gaar nit gää!

Grad alli drei vo uns hänn laider gaar nit duurebliggt,
und in der Klynik Aescheblatz unseri Schnùùre gfliggt,
wo d Rächnig koo isch, hämmer gstutzt, miir sinn doo nit elai:
E soo vyyl Zeen, wie die aim fligge, het nit emool e Hai!

Em Blocher syyni Dòchter kauft die ganze Basler Läckerli.
Das hätt jo au us Zürcher Sicht es wunderhärzigs Zwäckerli.
Jetz frisst si mit em Vatter zämme Siesses ooni Sörgeli,
vergässed nit, au s Muul z verglääbe vo däm chaibe Mörgeli!

Hai, was het die Doris Leuthard doch fir groossi Glugger,
und die Zeen, das frische Grinse – rainschte Puderzugger.
Z Bäärn, doo geen aim d Auge uff, mindeschtens e bitz,
numme d Madame Calmy-Rey het immer no so Schlitz!

Z Glaihyynige, doo hänn si bòòrt, und dieff im Boode unde,
het me mit der Zytt e Huffe haisses Wasser gfunde,
s wäär jetz ginschtig Weermi z haa, s wuurd au alli raize,
s git numme kaini Hyyser mee, wo me kennti haize.

Am Stainebäärg het's nimm vyyl Läärm, me het en kenne dämpfe,
Doo derfiir het d Muusigwält wiirgglig miesse kämpfe.
S het kaini Fäädere, das isch glooge, mir hänn uusegfunde,
s isch s neie Wullekneyel-Laager vo der Striggede dèèrt unde.

Bim Schwyzer Fäärnsee, s waiss es jeede, sinn e Huffe schwuul,
doo liebe Männer lieber Männer, schwuul syy isch halt cool.
Fiir der Fall, dass miir im Fasnachts-Queerschnitt sette koo,
betoone miir Gardischte gäärn: – «Miir sin hetero!»