My Dangg goot das Joor – mit eme Komplimänt -
fir d Määrtblatz-Lambbe - an s Baudepartemänt.
Jetz isch z Hoffe, ass si hinter de Roothuus-Schyybe,
au äntlig kenne lääse - was si amme soo schryybe!

Y ha non e Paddelböötli gfunde im Käller unde,
das duen y fliggen und machs zwääg - fir en Eererunde
im Stadthaafe - wo si wän baue - hinderem Kasäärnedoor,
y hoff y läb denn no - in 100 Joor!

Jeedi Bartei het e Stammhuus – ämmel,
d CVP dr Vatikan und d SP dr Kräml,
s Albisgüetli isch dr Stall vom „SVP-Zottel“
und uff dr Schandbangg in Bülach hogge d FDP - judihui!

Wenn y am Stainebärg gang go loose – no het’s gar nyt brocht,
si hän mit däne Fäädere und em Teere – zig Millione verlocht.
Drum sott me jetz die - wo im Baudep. dumm Schnäädere
so wie friener, zeerscht Teere und druff aabe Fäädere!

Wel’s jetz nimm z Dunggel syyg, machen d Architäggten us Ziri,
mit de Glasschyyben im Kunschtmuseum kai Harakiri.
Drotzdäm han y Verständnis fir das Zircher-Besträäbe,
wenn de gaistig im Dunggle und mit ere Schyybe muesch Lääbe!

No dr Fasnacht stell y my eersten Änggel,
wäg sym Lääbeswandel bees in Sänggel:
Me kifft nit – me sufft nit – y hoff das gseet er bald y
und kauf mer joo nie nyt - bim Liedl und ALDI!

Mit ere amtlige Verfiegig het men ungeniert,
dr Pluto als Planet im Wältall abserviert.
Au uff dr Äärde wärs meeglig – bitti glaubet draa,
ass me do s Glyyche mit em Blocher mache kaa!

No dr Couchepin-Methoode han y my Huushalt saniert,
y ha d Meebel verschärblet und s Gschiir demoliert,
d Frau het my verloo und d Kinder dien my hasse
und d AHV längt grad no fir d Granggekasse!

Wäge de Gaasgraftwärgg duet dr Leuebärger nääsele,
wel dr Strom us syyner Steggdoose dääti gääsele
und wenn dr Strom no duet atöömele, wäält men iin allefalls
wie dr ander Voogel in däm Joor – zem Atom-Wändehals!

Geege d Glasschärbe han y Fingge kauft, mit ere Silberschnalle,
au e Daschelambbe, ass y im Dunggle nid geege d Wänd due gnalle.
Jetz wart y underem Diireraame uff s näggste Beebe - in de Glaider,
doch laider gspyyr y nur dr Verlaider wäge däre Frau Schneider!

Im Basel-Land länge fir 260'000 Persoone,
5 Regierigs-Rammel/inne wo z Liestel ummefloone.
Z Basel aber bruuchts 7 fir numme 180'000 Gstalte,
he joo, wemmen 1 Naase mit 2 Gleezi muess verwalte!

Y kenn e zaggige Drämmler bi dr BVB,
dä goot jetz scho fir d 08 go Änglisch nee
und faar y im 6-er no Rieche zem dr Garte go jätte,
rieft er in Lutsprächer: You are now in the Häbermätte!

Wel die 5 Grufti und 2 Edelschachtle,
uff mym Schwyzergryz dien ummewachtle,
verdiente die mir aa, zer Strooff im Minimum,
10 Daag Yysferie – fiidleblutt - im Polarium!

Z Glaihynige het me Wasser in d Äärde druggt
und wäge däm wird sogar dr Deifel verruggt.
Dä bättet wäg dr Schneidere scho zem liebe Gott:
„Bitti hilf miir - wel si mer s Fäägfyyr lesche wott!“

Y finds nid guet, wenn z Basel gwissi Kommissioone,
ständig d Stadt kaputt machen und s Volgg aafloone.
Dä Värs isch nid luschtig, doch y sing en drotzdäm doo,
in dr Hoffnig, ass my Schattewurf - die wos aagoot - wurd erschloo!