E neue Tescht schloot e Baarne zimlig fescht uffs Gmiet
D Städter Kinder rächne schlächter als die vom Baselbiet
Für das bruuchts doch kai Tescht vo dääne Pädagooge
Die hätte doch ganz aifach dr Heiri könne frooge:
Die wo könne rächne, s’ liggt doch uff dr Hand
Ziehn scho sit viilne Joore us dr Stadt uffs Land

In Chile isch dr Dikatator doot
Obs dä Mensche dorum besser goot ?
Jetzt hänn si au dr Ander ghängt
Ob s dr Wält jetzt zu mehr Friide längt ?
Nai dodrfür miesst me, für my Empfinde
No en andere Herr lo im Busch verschwinde

Hänn mir zvyyl Schwoobe in däm Land ?
Oder nämme d Muslim überhand ?
Hets zviil Tüürke oder Balkaneese ?
Weiss ych doch nid isch doo my Theese
Was ych sicher waiss, dört sott me mischte
S het viil zviil Boulevard – Journalischte

In Züri da redet mit perfekt
Nei in Sanggt Galle red mr de Dialekt
Nei Bärndüütsch das isch wunderschöön
Drfür liebt mr üs Bündner in allne Kantöön
He Mann, was reded iir alli voll krass schwul ?
So wien ych Baselldütsch, das isch cool

Spitzemedizin soll nur no Züüri praktiziere
Do gried ych Gallestai und s brennt mi in de Niere
Transplantiere könnte me, jetzt stell dr das mol vor
Numme no in Züüri und denn beschtiendi d Gfoor
Wärsch wiider gsund und doch gschtrooft naimeduure
Hätsch näb dr neue Bumpi no ne Züürischnuure

Die ganz Wält gheit immer mehr usem Raame
Verhungerndi Mensche, Wirbelsturmdraame
AIDS, Kräbs, sexuell missbruuchti Kinder
Versüüchti Vögel, kranggi Rinder
Do hets doch dr Bischof Koch wirgglig guet
Dä kennt nur dä Sabo wo nid richtig duet

Dr Couchepin isch aktiv und duet fescht spaare
Er striicht alli Senilitäts - Untersuechigs - Verfahre
D Döggter hörsch drwääge luthals flueche
Ych verstand iin, dass är nüm losst untersueche
Är het mit däm doch nur verhindere welle
Dass me bi iim könnt die richtig Diagnose stelle

Um d Wiehnacht umme kasch dr Bligg höre wiete:
Mir Chrischte löön uns s Fyyre nid verbiete
Wisseschaftligi Untersuechige dien uns zeige
Dass d Lüt wiider mehr zu Mystischem neige
Und d Roche blaant für d Religion vom Gäld
In Basel s höggscht Minaret vo dr Wält

Zwüschem Gürkan und em Heidi Hugenin
Solls in dr Schuel kai Unterschiid mee gää
Dank Uniforme soll dä Labelstress verschwinde
Me sott au Uniforme für d Regierig erfinde
Do my Vorschlag, wo zu dääne wurd basse
Kai Schnitt, kai Form – d Farb am verblasse

Was hänn mir letscht Joor nid alles gschluggt
Mir hän gschwiige, obwool s uns heiloos druggt:
Dr FCZ Meischter - d Schwoobe im Halbfinal
Mir liide muggsmüüsli still und bisse brutal
D Läggerli an Züüri - Jetzt kasch uns nümmi heebe
Vor luter Wuet duet dorum dr Basler Boode beebe

D Frau Oeri will nid nur bim FCB
Iires Gäld verschwinde gseh
Dangg Parfum zeigt si dr ganze Wält
Aes stinggt nid immer alles Gäld
Bi dr SVP wo nach allne Syte duet gingge
Wärsch froh s wurd nur dr Geissbogg stingge

Worum bringsch das nöd vill mehr gnau ?
He Mann dasch fascht so wie vo Frau
He voll agressiv, Scheise, Goferdami
Jetz mach volle Pulle oder gang heim zu Mami
Nai, nid Pause im Bläsi Klass 2c
Dasch e Trainingsainhait bim FCB

Ych hoff iir händ alli e Blagette am Kraage
Und Yytritt zahlt ganz ohni z Klaage
Am Usgang verlange mir Ustrittsstüüre
Falls e Zeedel wotsch, zahlsch zerscht d Gebühre
Zum Helge zaige, bin y do nid in dr Laag
Sorry, ych bi bi dr UEFA under Vertraag