Also: zeerscht emool kaasch es vergässe,
dass mer Läggerli vo Zircher ässe!
Bi soome Deal, do miessti doch, der Haimedschutz yygryffe,
nit dass mer statt em Läggerli no s Blocherli mien pfyffe.

Wo der hailig Bappe häärzensguet,
die neie Drummle säägne duet,
sait äär zmitzt im Halleluja: „y hätt do none Bitt,
drummlet jo nie dä Arabi – das vertraag y nit!“

S Barbara Schneider isch e Bracht,
die waiss sogar wie men Äärdbeebe macht.
Wenn daas unsri Regierig isch, no sin mir dummi Kälber,
denn nuur die allerdimmschte Kälber wääle d Metzger sälber.

Letschte Summer, uf der Mittlere Brugg,
e enoormi Pflutte im "Buuchfrei-Look".
Zvyyl Frau in vyyl, vyyl z weenig Hoose – kurz voor der Explosioon,
Jä wo blybt denn, in soomne Fall, die Stadtbildkommissioon?

Im Bundesroot, do muess es glatt sy,
s gieng zue wie in der Fuessball-Natzi.
Der Blocher drampt ene uf d Fiess, der Couchepäng spuggt und pfätzt,
und s Micheline wo Offside rieft, waiss nit, vo waas sy schwätzt.

Der Erfolg vo dääre Unifoorm
in de Basler Schuele syyg enoorm.
Alli hänn die glyyche Limpe, esoo wirdsch nit verheent
und wenn si speeter Drämmler wärde, no sin si scho dra gweent.

“Hello Fan’s hier speaks your Drämmli-Piloot
and dä say to you, bivoor äär you uuseloot:
y hope for my, your national team, is winner of the match.
Greetings from Heiri - Depot zwai - and suffet nit too mutch!”

Won y im Dezämber haimekumm,
haut mi d Wienachtsbelyychtig um.
Y froog: „wäär het dä Santiglaus wo blinggt an d Hütte ghänggt?“
Fäälalarm: S isch nuur mi Frau - die het in Stegger glängt.

Der Sämmi Schmid het sich am Stones Konzäärt
als Rocker goutet und ergläärt:
Soo wie dä Mick Jagger uf der Biini d Sau abloot,
bin ych au, wenn s Thäperamänt, als mit mer duuregoot.

Fir d Borblem bim FCB do ghöör y,
haig si jetzt d Leesig – d Gigi Oeri.
Wär nit kämpft und ummesegglet, dass es dätscht und gracht,
us dämm wird in der Pause, FCB - Parfüm gmacht.

S Barbara Schneider straalt vo Fäärn
Jä Barbara, du bisch mi Stäärn!
Du lyychtisch ibere ganze Määrt – so häll y kaas kuum fasse,
du kunnsch mer wie dä Pluto voor: e Planet mit zweenig Masse.

Jetz kunnt e raabeschwarz Kabittel:
Schwoobe in de Basler Spittel!
Im Geegezuug do sotte miir, doch daas kasch glatt vergässe,
zem Keschte spaaren iibere, iir Gammelflaisch go frässe.

Jeede, won e Bitz trainiert,
dä wird uff Doping kontrolliert.
Drum mien au die vom Altersturne in e Gleesli saiche,
s Dumme isch numme, dass die Maischte, s Gleesli nimme braiche.

Wenn e Basler e Häärzbaragge het,
no waiss y, was d Frau Diener wett:
Dä sott, damit’s fiir sii rentiert, uff Ziiri in e Näscht.
Doch wenn e Basler daas erfaart, denn git’s em grad der Räscht.