Wie e Lauffyyr macht e Mäldig d Runde,
in Ziiri syg dr Böög verschwunde,
y verstand dass Ziircher druurig sinn,
s isch doch dr ainzig Grind mit Power drinn.

Mache si mi jo nit muff,
und behaupte uff däm Helge syg nit druff,
me ka doch do ganz dytlig gsee,
e Gaischterspiel vom FCB .

Dr Christoph Blocher macht mir Muet,
ych zieh sogar vor ihm dr Huet,
är behandlet alli Mensche glych,
ob vermeegend oder rych.

I ha e gynschtigs Rennvelo kauft,
und has uffe Namme «Ländis» dauft,
damit s bim fahre nit bletzlig harzt,
vertraui au sym Mannschaftsarzt.

Dass sich d Schwoobe nimm vermeere,
duet mi sicher nit gross steere,
wenn s Problem doch aber waisch,
jo denn frisst me nit no Gammelflaisch.

Y ha absolut jo nit dr gege,
wenn d IWB d Ärde duet bewege,
nur sott si das dr Daag duure mache,
dass die im Rootshuus au verwache.

Dr Zinedine Zidane,
isch scho e bitz e Syydiaan,
stell dr vor dä Wildimaa,
hätti au no Hörner ka.

Si syge schynts total veraltet,
drum wärde z Basel d Plätz umgstaltet,
dr Schneidere vergingti bestimmt au s lache,
me wurdi s glych, mit Ihre mache.

An dr WBS hänn si Ainhaits-Glaider a,
dass me si kum me underschaide ka,
so hett me haimlig doch yber Nacht,
us alle Schiler Schwyzer gmacht.

Mit mim Grooskind ha ni geschter z nacht,
e baarmool Balleschiggis gmacht,
nodäm y jedi dritti Balle gfange ha,
lyttet mir d Frau Oeri a.