Si mechte neji AKW – dr Stroom wurdi uns knapp
Dr Moritz findet’s nid okee: Wie griegsch dä Drägg denn ab?
D’Putin-Leesig vom Probleem, si blybt im nid verboorge:
Dä schiggt per Boscht s’Plutonium uf London zum Entsoorge.

Zwai Buebe, wo im Wald dien schiffe, wärde grad nerveeser,
Will si mit Sytebligg begryffe: «Ouu, dä hett dr Greesser!»
Si meergge, mir sin metaphorisch. S’wird uns allne schtuurm,
Wenn alli frooge: «Isch das woor, isch myyn dr heegschti Duurm?»

Jede Moorge, wenn-i Kaffi koch duet d’Äärde ganz lyycht beebe
Und wenn-i Liecht zum Lääse mach duet s’Kommeedli beweege.
Won-i lenger haiss ha dusche welle zum in Usgang goo,
Hett d’Äärde aimool gschluggt und Baasel isch jetz nimme doo.

Nodäm die Bundesplaanigsschtelle trogge konschtatiere,
Dass Basel dät zue Ziiri zelle, goot uns das and Niere.
Drno hett uns dr Christian gsait: «S’isch gar nöd s’Dümmscht uf Erdä.
Es schiint di letschti Möglichkcheit zum doch no Meischter z’wärdä.»

Dr letschti hämmer mit em Wello Wunder welle wooge,
Sin via Bankverain vom Wettstaiplatz zum Barfi zooge.
Mir hätte’s sogar gschafft, trotz Bauschtell, au wenn die rächt schteert.
E Drämmli hett uns iberrollt, will me die nimme gheert.

Dr Schattewuurf vom Stadtcasino wäri voll dr Saich
Denn ooni Sunne uffs Museum wurdi s’Pypply blaich.
Dä Irak-Bau isch e Schlamassel, wo me no sett leese.
Uf aimool zellt dr Schorsch Busch Baasel zue dr Aggs vom Beese.

Zum Billag spaare hett e Wiener voll improvisiert
Und in sym Käller e privaats Big Brother installiert.
Ti-Wi voller Reäälitii – extreemer as me aant:
«Basel sucht den Eskimo» isch im Polarium blaant.

Fingerabdrigg han-i miese gää, ganz geg my Wille.
Derzue e Bild vom Kopf, em Siesse, ooni Huet und Brille.
E Spaichelproob, e Auge-Scan und was waiss ych no mee!
Jetz ändli deerf-i wiider an e Matsch vom FCB.

Myni Styyre zahl-i nei mit Budget-Mastercard.
Und die mit Cumulus und Meile, won-i mir ha gspaart.
Mit Coop-Super-Credit-Karte zahl-i das in Rue.
Und d’Visa zaalt denn dää Betraag. Bruuchsch gar kai Gäld drzue.

Doris Leuthardt isch so schlau, si dänggt au an die Schlaffe
Sait dr Schorsch zue syyre Frau: «Ych gang bim Bund go schaffe!
Druff kriegsch e Kind, am beschte drey, i-lieb di doch so seer!
Als Vatter krieg-i denne frey und faar elai ans Meer!»

Im Bayrisch Wald – so isch es halt – do wiirsch als Bäär abknallt.
Es duet ys wee – doch no viel mee – mir dängge: Wenn’s ne gfallt!
Ai Bär goot jetz ändli wäg. Si wisse sicher wäär.
Am Sässel klääbe het kai Zwägg. Servus, Edmund Stoi-Bäär.

Dr Basilisgg isch’s Woppedier vo Baasel, mym Dehai!
E Lai in Ziiri, z’Bärn e Bäär, dr Haas in Liechteschtai.
Politisch gitt’s so Dierli au, s’isch guet, wenn me das waiss:
Byr SVP, do passt’s genau, denn Gaiss raimt sich mit Sch....