«Hello, mäi Neym isch Fredy Lutz, äi Schofför ByVauBy.
Mit aur Drämmli yuu wirsch cämm scho glyy tu Eglisyy.»
Uff aimoll blybt das Drämmli stoo, s isch nimmy wyter graist.
«O shit!», dänggt är, «ych waiss nimm, wie uf Änglisch Rieche haisst.»

 

Die Beebe in Glayhyynige hänn uns esoo verschreggt!
Jetz sinn mir froo, wenn ain bim Staat dr Griffel aane leggt,
syy Zytig liist, e bizzli pfuust, im Byyroo Färnsee gafft,
ass jo d Frau Schneider nie me sait: «S wird doo mit Hochdrugg gschafft.»

 

Dr Maa kunnt hai und sait «Hallo», und d Frau maint au «Hallo».
«Isch d Zytig doo?», frogt är. Druff sii: «Jä, d Zytig, die isch doo.»
Denn hänn sy glääse, nyt me gsait, au wo me zämme isst.
Me gseet: D Frau Pegoraro het vom Maa bestimmt nyt gwisst.

 

Dr Sportminischter Sämi Schmid kennt sich im Fuessball uss:
Penalty – Freistooss – Händs und Foul! Bi allem kunnt är druss.
Jetzt wänn au Couchepin, Blocher, Merz verstoo, wie s Schutte goot
und wie me d Doris und d Micheline ins Offside lauffe loot.

 

Noo drey Stund kunnt d Frau Saaresyy bim Doggter äntlig draa.
Kuum isch sy draa, do frogt dr Arzt, ob sii schnäll waarte kaa.
Är haig e ganz akute Fall, s pressiery wie verruggt,
är miess ganz schnäll zer Migros goo, die haig dr Denner gschluggt.

 

Bim Proobe rieft dr Dirigänt: «Orchestra isch zu luuuutt!
Piano prego alli do, susch Oohre glyy ggapuuuutt!»
«Mir sinn is gweent fortissimo», sait d Gyygere versteert,
«suscht hesch als friener im Casino numme d Drämmli gheert.»

 

Du, Gläärli, frogt d Frau Merian, verfolgsch du dä Prozäss
mit Corti, Fischer, Bruggisser? – Jä, ych liis dääglig d Präss.
Die mien jetzt d Hoose aabe loo, wirsch gsee no als wie mee.
Ych blang scho druff, ass ych se glyy bi Chippendales ka gsee.

 

S het uns e Gaissbogg uf dr Waid bim Wandere soo blogt:
Dä stinggig Bogg gryfft jeede-n-aa, är daibeled und boggt,
är wielt im Drägg und meggeret, zaigt d Heerner als wie mee –
jä, so n e bruune, stuure Bogg passt guet zer SVP.

 

Will d Fläschli, Tyybli und au Crème ins Flugzyyg nimm darfsch nää,
und d Meiere baartu nit will ihr dyyrs Barfym abgää,
het si iir Nina Ricci gschluggt und Buuchwee griegt drvoo –
iir Fluugi isch als Gaasballon fascht nimmy aabe koo.

 

Dr Conti sait zem Hanspi Gass: «Ych wäsch mir ständig d Händ,
in Lieschtel hänn sy Schimmel an de fiechte Källerwänd!»
«Bi mir isch s z warm», sait druff dr Gass, «do findsch kai Schimmelpilz.»
«Wenn d numme haissy Luft verzellsch, denn wuechret nur dr Filz.»

 

Wenn d ‹Fäädere› mit ‹Ball› verbindsch, git s zämme ‹Fääderball›.
Machsch s glyych mit ‹Hiener› und mit ‹Stall›, git s zämme ‹Hienerstall›.
Mit ‹Biine› und mit ‹Schwaarm› bikunsch ganz logisch ‹Biineschwarm›.
Mit ‹Amis› und mit ‹Pfaadi› git s – am Bahnhof Grossalarm!

 

Am Baanhof brielt e Pinguin, s duet im verdeggel wee:
«Wenn d Baasler kai Polarium wänn, het uns dr Zolli gsee.
Mir bitte um Asyyl in Bäärn, vier Kinder und my Frau,
e Kupple het jo s Bundeshuus – und froschtig isch s dert au.»