All Pfitz e neue Rächtschryybfurz.
Die Komma-Regle sinn mir schnurz.
Ych schryyb - was mii praggtisch dunggt -
alles ooni Komma - Punkt.

Buurereegle:
Kräht der Güggel auf dem Mischt
ändert der Duden - oder er bleibt wie er ischt.

 

Wo sich tout Bâle am Stuel muess heebe,
will sich d Bälgge biege und d Bööde beebe,
maint d Schneidere - si kunnt grad uus der Baadi -
„...dasch nur soone Iebig vo de Pfaadi....“

Buurereegle:
D Schneidere spuurt jezt, numme laider
ischt sie noch gar nicht aus dem Schneider.

 

Zerscht der Blocher, denn der Pabscht, das sinn mer no Sache,
sinn uff Istanbul graist, go guet Wätter mache.
Do gits nyt z besänftige und nyt z kääre:
dääne muesch ganz aifach der Tarif erklääre.

Buurereegle:
Jetz wird der Blocher, dä alti Gnoche,
no vor em Benedikt hailig gsproche.

 

Statt „s stinggt mer“ saisch hütt: „Mann, s scheisst mich an!“
„Kunnsch druss?“ haisst jetze: „hesch es tscheckt, oh Mann?“
S kunnt d Sprooch uff e Hund noch und nöcherli
sogar d Läggerli haisse scho «Blöcherli».

Buurereegle:
An der Fasnacht bisch am Arsch,
statt «Läggerli» haissts «Züri-Tirggel» - vorwärts Marsch!

 

Die luschi Zahnarztpraxis am Äscheblatz,
grad schreeg gegenüber vo der Baz,
dört loss ych mi bestimmt nie bligge...
ych ha e Gebiss - und das loss ych in Ungarn fligge.

Buurereegle:
Die diefschte Löcher - waiss jeder Bauer -
boore die vo Geo-Power.

 

Au ych ha mir, ganz der Moode noo,
bim e Schöönhaitschirurg s Fätt absuuge loo.
Jetz bini zää Kilo lyychter - juhee -
aber laider - oojee - nur am Portmonee!

Buurereegle:
Kuum ass d Müllere s Meringue hindere schletzt,
der Schöhnheits-Chirurg das Messer wetzt.

 

Die neu Gondelbahn uff d Wasserfalle
isch no drei Daag Betriib scho ins Wasser gfalle.
Noo wyttere drei Daag sinn si fertig mit fligge,
dääne sott me emool unsri Combino schigge!

Buurereegle:
Der Combino isch frieschtens wiider frisch,
wenn s Neujoor im Summer isch.

 

In der Hagnau isch, kuum isch d Dampfwalzi «futt»,
dää dyyr neu Belaag scho wiider kabutt.
Er het Runzle und s ratteret bim Drüberjette...
... jä nu, s näggscht Ärdbeebe duet en scho wiider glette.

Buurereegle:
Öbs rumplet und tschätteret interessiert kai Sau,
in der Haagnau stoosch sowiesoo im Stau.

 

In der Basler Regierig, so höört me saage,
gohts jetzt eme Dep...artemänt an Graage.
Das wär doch au für der Bundesroot nätt,
wells dört denn ai Depp weniger hätt.

Buurereegle:
Aazelle, Bölle schelle,
wär het wär doo nümme welle?

 

Hütt bin y uff d Boscht, go d Yyzaalige mache,
für Gas und Eleggtrisch und sunscht no baar Sache.
S macht zwaidausig Stutz samt‘me Vorschuss an d Styyre,
d Helfti fürs Zyyg - der Räscht sinn Gebyyre...

Buurereegle:
Uff der Boscht, das isch s fataale,
muesch näggschtens no firs Waarte zaale.

 

Gescht han ych mir e neu Händy kauft
und ha sofort überprieft, öb au alles lauft
Ych ha Färnseh gluegt, umme gsurft und alles brobiert:
kaa mer jetz öbber no saage, wie drmit delifoniert?

Buurereegle:
Nur öbbis haani noonig entdeggt
dasch: wie myy Handy Aier leggt.

 

Vo Pisa hämmer wiider schlächti Noote bikoo
im Rächne und Lääse, im Singe sowieso.
Aber sytt neuschtem könne mer glänze:
mir sinn mit Abstand die Beschte im Schwänze!

Buurereegle:
Glyy göhn jezt denne, das isch s Coole,
nur noch die Lehrer in die Schule.