Bim Hänsel und bim Gretel loggt e Häx mit Knuschber-Knysli
Die arme Kinder an d Läbkuechewänd vo ihrem Hysli.
In Basel und in Wirggligkait, do güggelet – oh Gruus !
Jetz d Häx vom Zircher Protzehiigel us em Läggerlihuus.

Dass Bärn und Basel besser sin , als Ziri, das z bewyse
Probiert dr Carlo Conti mit de tyrschte Expertyse;
Die exklusivschte Fachlyt schleen - fir s Gält ! - ihr Wisse brait.
Nur muesch Di Dir bewusst sy, Carlo: Ych hät s gratis gsait !

Wel s Basler Volgg schynts s Hahnewasser als wie meh verwaigeret,
Het d Dyräggtion vom IWB dr Prys e bitzli gschtaigeret.
Dass weniger mues tyrer sy, das isch doch gly erklärt:
Das sin jo in däm Wässerli scho d Chemikalie wärt !

Dr FCB isch vorne z schlicht und hinde z wenig dicht –
Wenn wyterhi das Team nit sticht, git das e beesi Gschicht.
Was macht jetz d Gigi Oeri nur ? Ych wisst ere e Mitteli:
Vergiss doch all die Schütteler und inverstier in Ditteli !

Sobald dr Benedikt vo Rom in s Usland goht go trämpe,
Hän d Kardinäl d Soutane voll; si wisse: jetz git s Lämpe !
Dr Sämi Scjmid hingege raist in s Usland ohni Nor,
Wel dä, au wenn er s Muul bewegt, ganz sicher kain verstoht !

Z Australie döst eKänguruh, erschöpft vom vyle Gumpe,
Wo plötzlig an sym Beutel ebbis afoht ummebumpe.
Äs luegt an Sagg, äs gratzt am Kopf, und denn ergryft s no s Wort:
Do het glaub son e Lychter z Basel geothermisch bohrt !

Dr Beyeler in Rieche zaigt e Joor lang nur no Blutts:
Vo vorne, hinde, obe unde – ohni Juged-Schutz.
Und wenn s nit rächt rentiere sott, sait är em Kassier: Waisch !
Das findet scho no Absatz uf em Märt als Gammelflaisch.

Dr Dänggmolpfläger Dingedinge wurd die Stadt nim kenne:
Si gseht scho wien e Urwald us vo luter Funkantenne.
Drzue die Swisscom-Möbeli – was kunnt ächt dört drus uuse ?
Die ganzi Stadtbildkommission, wo fertig isch mit Pfuuse !

Die Anti-WEF-Chaote sin uf Basel abe ko
Zem do mit ihre Gspeenli unseri liebi Stadt z verschlo.
Mir bruuche die Chaote nit fir Schäde und fir Schutt –
Uns macht scho d Plätz und Stroosse unseri Schneidere kabutt !

Die Schuelreform vo Basel git e ganz e grosse Hit –
S mues ebbis wirgglig Bsunders gä, wo s sunscht no niene git !
Si wird gerächt und biologisch wird si au, dasch klar –
Und wenn si ebbis tyrer wird – si isch vom Havelaar.

Dr Basler Hafe und dr Hafe vo de Baselbieter,
Die zämme z leege schyteret an Baselbieter Gmieter.
Si maine dängg - und sin fir so Modärns no nit barat ! –
Dä Basler Hafe syg so ebbis, wien e Klosomat.

Als Basler Schugger bisch im Stress – es isch efang zem Hyle:
S het Hooligans, s het Sonigi, wo Kügeli dien deale.
De bisch im Ysatz, wenn s Kravall vo Demonschtrante git,
Und machsch am Samschtig au no an dr Pfadi-Iebig mit.

Atomkraft oder Wasser oder Geo oder Gas ?
Wo nimt me d Energie nur här ? E haikli Froog isch das !
Ych glaub nit, dass mit Russe-Gas me wirglig s Richtig trift:
De waisch jo bi däm Putin nie, ob Gas kunnt oder Gift.

Zerscht d Hingis, jetz dr Federer – mir mien ys gwis nit schämme,
Wie dä sich mit sym Bälleli vo Siig zue Siig duet slämme.
Und wenn denn s Tennis umme isch, git s brueflig halt e Wandel:
Denn wird är non e ryche Ma im Suppeschissle-Handel !

D Frau Merkel setzt z Davos am WEF sich sehr fir d Umwält y;
Dehaim vor ihre Autobauer isch das denn verby.
Si ka zue glaine Auto ihri Schwobe nit verfiehre –
Die mien so groossi Kischte ha zem d Schnuure transportiere !

Dr Migros kauft bim Denner grad dr Laade sälber yy
Und het jetz näbe Sygarette au no Schnaps und Wyy
Me stuunt wie die bim Migros kenne dääwääg iberboorde
Kai Wunder isch em Konsi do sy Angge ranzig worde.