D Trämler leere Änglisch, y find das guet,
dass me ebbis fir d Velkerveständigung duet.
In de Combino saage sy denn ganz perfäggt:
"Plyys lyyf se Trämli, wyy hääf e Defäggt."

In jedem Viagra - jä Sii, das macht Sinn -
isch e ganz glai Stiggli vo m e Combino dinn.
Sy mergge scho, worum s duet goo:
Die blyybe halt am längschte stoo!

Dr Erich Straumaa dritt as Regierigsroot zrugg!
Dr Erich Straumaa dritt as Regierigsroot zrugg!
Es duet mr laid, wenn Sii die Widerhoolig steert,
aber hänn Sy vo iim scho mol soo vyyl positivs gheert.

Alli mini Änte
au d Elsbeth Schneider goot in Ränte.
Alli mini Äntli
äntli(g).

Y ha letschti mym Noochber, ganz ungeniert,
z Däärwyl, bim Haikoo, an s Huus uriniert.
Jä Sii, was hät y mache sotte?
Z Basel isch s doch jetzt verbotte!

Dr Christoph Blocher goot in dr Tirggei
wäg em Rassismusgsetz vor de Tiirgge uff d Gnei.
Wider zrugg erkläärt er, y ha s nid vergässe:
Er haig die bruuni Zunge vom Läggerli ässe!

Dr Randegger loot dr Schwyzer Urs draa.
Er daarf sy Platz im Nationalroot haa.
In zää Monet sinn Waale, das het doch kai Zwägg:
Bis dää weiss, wo n er sitzt, isch er wider ewägg.

Nyt saage, bleed luege, e n aifältigs Gsicht:
Da'sch e Swissair-Verwaltigsroot vor Gricht!
Uff dr andere Syte, was wänn mr mee griege?
So bisch wenigschtens sicher, dass sy nid liege!

Sii, dr Pegoraro, het er jetzt glooge?
Oder nur an dr Wooret ummebooge?
Das stinggt doch zem Himmel, dängg y amme:
Welle Maa schänggt scho eppis dr Schwiigermamme?

Sie schwätzen weiter Hauchdeutsch im Grossen Root,
obwohl es nicht bei allen ganz gut goot.
Bis Bessere kömmen, müssen wir halt noch warten:
Die sind nämlich erscht im Kindergarten.

Das SVP-Maskottli, joo, dr Gaissbogg Zottel,
sesch jetzt allewyyl mit em Dingsdo und däm andere Dottel.
Die sinn ständig am meggere, dass me bald nimm waiss:
Schwätzt jetzt dr Dingsdo, dr Dottel oder schwätzt jetzt die Gaiss?

An dr Fasnacht bim Singe frogt my ständig irgend ain,
wär genau vo dr SVP y mit däm Dottel main.
Jä, so uff d Schnälli fallt mr denn au kaine n yy.
Aber wenn y s jetzt so iberleg, ka s jeede syy!

In Ammel het amme dr Amme dr Bammel,
dää vo Bämbel isch stolz uff syni nüünzg Prozänt Rammel,
in Buebedorf deeche au Meitli woone,
in Buus hei sy Lüüs an de Stangeboone,
dr Pfarrer vo Diegchte het sy Chöchi kchüsst,
zwöi Stund spööter het s d Verchäufere im Milchhuus scho gwüsst,
in Ettige isch scho am halb vieri Schatte,
in Gälterchinde stoot e Schoof uf dr Matte,
sy hei z Hämmigche Chrach in dr Turnerryyge,
in Hölschte loot ein e Drache lo styyge,
wäg' em Lärmschutz, het dr Gmeinroot vo Lause bistumme,
darf am Frytyg dr Männerchoor numme no summe,
in Lupsige sy diis Joor d Chirsi schöön rund
und rot und saftig und fruchtig und gsund,
in Muttenz het e Loggi bim abfaare pfiffe,
in Nänzlige die sy uff em Pausehoof kiffe,
In Oltige het ein, me cha s fascht nid fasse,
e Dreiblatt gwiise bim Schieber- Jasse,
in Prattele baschtlet ein Flööte n uss Moos,
in Riggebach schysst e Chue uf d Strooss,
in Röschenz göön gar nid alli in d Chille,
in Sissech wird eini schwanger - trotz Pille,
in Thürne het ein e Witzli gmacht,
druff hei z Titterte zwee und noo eine glacht,
in Weislige cha eini linggshändig schryybe,
wie dr Gysy lauft z Ziife so n e Dotsch in e Schyybe,
und in Zunzge rysst eme chlyyne Maideli s Gummi-Twist-Seil.
Und fiir das het jetzt d Baz dä nei Landschäftler-Teil.