I bi mit myner Fasnachtsgage das Johr nid ganz zfriide
Drum ha mi für e Boxkampf geg de russisch Riis entschiide
Dr Gang zum Ring isch zwar chly lang, han ich lut überläit
Druf het de Russ mir gsäit: uf em Ruckwääg wirsch jo träit

Dr -minu hebt im Innocent s Händli und säit still
Wo in dr Beamti frogt: jo, Herzilein, yych will
Dr Papscht duet de Entscheid us tiefer Bruscht begriesse
Ändlig e jungs Päärli, wo het welle und nit miesse

Dr Grossrot well dr ganze Stadt en Uniform verpasse
Me mies e Bebbichütteli samt Bebbimützli fasse
D Regierig well sich au in so ne Äinheitskoschtüm chläide
Derby chasch die jo numme dank de Chläider unterschäide

Wie jedes Johr het mi d Wiehnacht plogt
Was bruuchsch, han i duuch my Jüngschte gfrogt
S Probleem isch, dass är praktisch alles het
Do strahlt er: en Äärdbeebebaschtelset

S Lauberhorn wird düngt im Winter, d Gletscherzunge bluete
D Schneekanone schwyyge, an de Küschte styyge d Fluete
De Gämsi waggse Zebrastreife, zoberscht uf den Alme
Frässe si scho vor dr Fasnacht d Dattle vo de Palme

E Sturmgwehr häig dehäi nüt z sueche im Chaschte
Verlangt d Frau Fetz und haut e Gsetz in d Taschte
I gseh das y, doch miest me - im e Näbesatz für d Manne
Us jedem Schwyzer Chuchichäschtli s Wallholz verbanne

Im Gegesatz zum Gigi bruuch ich käi Solarium
Bi au käi Pingu und spendier nüt ans Polarium
Für äi Projekt am Südpol aber spar my dumm und chrumm
Im tiefe, chiele Packyys - für e Zanolarium

Die Hundertsekunde-Tagesschau
Hol ich mir uf s Handy, säg i zur Frau
Doch chuum start i, wird i bläich und bläicher
Eläi s Muul vom Blocher verjagt mer der Späicher

Dr Usverchauf vom FCB goht munter wyter
Au d Läggerli wäggsle dr Kondyter
Will s Mirjam Blatz in dr Bachstube haig
Häiz es jetz dr Oofe für e ganzi Basler Daig

Dr Vosseler, das unverdrosse Umwältfossil
Fischt im Atlantik pazifistisch und solarmobil
D Regierig hofft, er tryyb no lang nit zrugg an Ryy
So spar si do - au ohni Sunne - souvyyl Energyy

Was leere mir vom Grounding, frogt dr Lehrer dr Fritzli
Chumm zu mir an d Tafele und hirn e bitzli
Dr Fritzli schiilt zur Türe und schnuuft tief duure
Frooge sy zmittag my Awalt - ich halt d Schnuure

An dr Tour de France het my Sportchef gsäit: los, pack
Am letschte Bärg de Landis Floyd us em Team Phonak
I ha gschwitzt und gstramplet wie ne Wilde, s het nüt gnützt
Statt EPO han ich Depp vor em Bettgoh Epesses gsprützt

Die Räntnerfahruswyysüberpriefigshyschteryy
Närvt mi Nochber, är isch nünzgi und no voll drbyy
Fahrt ruckwärts us dr Garage, vo hinde riefts: au
Das isch s letschte Wort gsi vo synere Frau

Dr Schmid Sämi wird in sym Amt nümm froh
Panzer und Söldner het men iim gnoo
Am Stones Konzärt in Dübedorf het är käi satisfaction
Blybt no d Wasserfallebähnlitaufi - das isch action!

Syt dr Murat d Muure stellt bi Congeli
Muure d Congeli nümm so wie Chünngeli
Wotsch du glyych so Chlüngeli vo Chünngeli gseh:
Die hopple über d Stopple vom FCB

Dr Bucheli in syne Charles Vögelihose
Stellt mir die schönscht Schönwätterprognose
Nach dere Top-Prognose han ich äins begriffe:
Trotz de neue Hose chunnts halt äinewäg cho schiffe

Was unterscheidet Music Star vo öisem Bundesrot
In bäide Fäll isch mir nid klar, um was es würklig goht
Im Gegesatz zum Bundesrot, dasch immerhin hööch z wärte
Brucht Music Star für äi Entschäid nur grad drei Expärte