S isch klaar, nit jeede Drägg loot sich lo komposchtiere.
S Maischt muesch entsoorge – guet – me kaa s jo moll brobiere.
Doch will s nit goot, hän miir dä Bebbisagg derbyy,
drum aso göön sy hai, mer sammle s Gschiir jetz yy!  

Jä wottsch der hüt e Läggerli in Schnaabel stegge,
denn sottsch zeerscht tschegge, obs nach Ems Chemie duet schmegge!
„Dasch gaar nöd woor, dir Basler tüent doch nöd so blööd,
y ha nöd d Finger drin – und s Geld das stinkt jo nöd!“  

Die saage „D Strooss ghört uns“ doch dasch jo gar nit woor.
Wäär waiss, was het ächt d Barbara im Ghaime voor?
Sy briete zämme stundelang am runde Disch,
über e neie Kraisel, wo no runder isch.  

Das wär der Väärs vom Cohn und de Mäzeninne,
die machen iim denn als am Morge amme Zeen yyne.  

Grad gescht im Zolli bi de Känguru im Gheeg,
do kunnt e Wuurm zem Booden us mit sym Kolleeg
und rieft voll Fraid: „Jetz lueg die Beyteldier! Hesch gsee?
Mer sind z Auschtralie, dangg däm Loch vom IWB!“  

Das isch dä Duurm, wo sich in Himmel schruube duet,
sy Hööchi isch enorm und d Foorm – das bruucht scho Muet!
Die Konstruktion isch genial, nach neischter Moode,
dä schrubbt sich au, wenn s wider Schüttle duet, in Boode!
 

Jetz hööret doch uff - s het scho im Mittelalter bäbbt!
Und denn het Barbara jo – glaub y – nooni gläbbt.  

Pinguin us Plüsch, Pinguinfigüürli us Taiwan
und Pinguinlämbbli, Pinguinkeerzli, s heerscht ai Wahn!
Me raist an Südpool, will die Dierli aim halt riere,
und dangg em Klimawandel mien sy nümm lang friere.  

Es wait e neie Wind uff der Finanzverwaltig,
sy schaffe flyssig, s Resultat isch ganz gewaltig.
Me duet nümm gryzwoorträtsle, blämperle und dööse,
me schryybt jetz schwaarzi Zaale – bim Sudoku lööse.  

Die glaini Lisa fangt e Fröschli us em Dyych,
au wenn s verbotte isch, das isch doch iire glyych.
„Wurum darf yych denn daas nit, was d Madonna ka?
Die nimmt sogar e Biebli hai us Afrika!“  

So, jetz isch Schluss, miir zwai (und ych) göön zrugg uff d Strooss.
Und denn am Bummelsunntig isch denn öbbis loos!
Mer pfläge d Fründschaft mit der Landschaft und dernoo,
denn löön sy mii als Ussglyychszaalig döört lo stoo.