Solang mir singe, deerfe Si
Do inne wyterrauche
Au är dert hinde sell ganz gnisslig
An sym Stumpe schmauche
Denn wenn als luegsch was in de Baize
Uff dr Däller kuunt
Do finde mir isch rauche jo
Aigedlig no gsund

Good morning do isch d Leitstell one
Please gib mir dy location
Sali Hans here isch dr säggser
Bi dr Bayeler Foundation
Sii glaube jetzte sicher
Mir zwai hätte aine drungge
Nai so dien jetzt d’Drämler
Syt em Sproochkurs zämme fungge

Au mir sind uff dr Münschterbuggel
Zem is registriere loo
Jä irgendwenn do muesch halt aifach
Zue dr liebi stoo
Und dangg dr Life Science wirsch es gseh
Do wette mir e Lappe
Wirds mit em Buschi griege
Au bi uns emool no klappe

Ganz unverschämt verlange d’ Zircher
D’ Spitzemedizin
Am liebschte usser d Sulzerglänggli
Jeedi Disziplin
Dass die e Härzstation gärn hätte
Kenne mir verstoo
Hirnchirurge wurde z’Ziiri
Numme umestoo

An däre stell do gheert
Im Köbi Kuhn no gratuliert
Nit mänge Trainer am Turnier
Het taktisch so brilliert
Hätt är dr Frey no kurz vor Schluss
Nit sofort uuse gnoo
Denn wäre mir no us Versee
E Rundi wyterkoo

Im letscht Momänt do händ mir uns
No d Maischerschaft loo nää
Schugger und Chaote händ sich
Uff dr Ranze gää
Mit Gaischterspiil in d Saison starte
Schlächter kenns nimm goo
Und denn isch no als neie Goali
Die nägschti Pfluume koo

Egal eb uff dr Barfi
So e Klotz wird aanekoo
Au d Roche deerf me die hässlig Schruube
Rueig baue loo
So lang mir no d Frau Schneider
Geothermisch boore leen
Wär das fascht e Wunder
Wenn die Baute sehr lang stehen

Zeerscht imme flotte Zigzagkurs
An offne Glais verbyy
Denn unde linggs bim Grosscontainer
Im Bagger hindedryy
So händ mir das bim Bankverein
Im Summer als erkläärt
Wenn uns Tourischte gfroggt händ
Sii, wie kunnt me uff dr Määrt.

Im Grund gnoo isch s Polarium
E glungeni Idee
Pinguine au emool
Uff Kunschtyys deerfe z gsee
Und wurd me denn die Viecher no
uff Schlitschue fahre loo
Denn hätt dr EHC e Mannschaft
Wo si kennte schloo

S Mirjam Schätzi het zem Runde
E Firma yberkoo
Dr Babbe het ganz still und haimlig
D Läggerli ibernoo
Blocherli heisst s ney Produkt
Wenn denn alles klappi
S het oobe rächts en’Egge ab
Ganz wie ihre Papi

E hitzigi Debatte lauft
D CVP macht Drugg
SVP paktiert mit Linggs
Do tritt dr Murer zrugg
S ganz Parlamänt e Saustall
Alli gumpe sich an Graage
Nur well me z Flims nit einig wird
Golfe oder baade

Die scheenschti Karte zem Neijoohr
Kunnt us em Bundeshuus
Alli zäme uff ainre Linie
Laufe sy graduus
Wo mir dä Helge gseh hän
sind uns Fraideträäne koo
Stell dr vor sy laufe los
Und blyybe nimme stoo