Wäge so Schäde bi de Luftsailbahnkabyyne
nimmt Reigoldswil die baar Kabyyne wiider yyne.
Dasch klaar, ass miir au doo dien partnerschaftlig dängge
und däne gratis 10 Combino uffehängge.

Vyl Beweegig duet d Regierig uns empfähle.
Scho vor em Zmorge sottsch die miede Gnoche quääle!
Hänn die im Roothuus wirgglig kaini andre Sorge?
Mir beweegen ys samt Näscht jo jeede Morge!

Im Goal dr Petric, denn zwai Stürmer - zimmlig hinde.
Wyt vorne d Abwehrspiiler, wo grad d Schueh mien binde.
Und uff em Bänggli rieft ain: Looset, d Taktik luttet:
Schön ass Dr doo sinn … s spiilt kai Rolle, wo ain schuttet!

E Buur am Lauberhorn, dä sait sym Sohn - em jüngere:
wenn d hüt dr Bärg uffahrsch, jä lueg denn guet bim Düngere!
Wenn die am Slalomhang vo Zyt zu Zyt dien starte,
muesch mit em Gülleschluuch derzwüschen e bitz warte!

Mir sinn im Summerjupe im Jänner ummegschländeret -
also Sii, wie sich das Klima schnäll veränderet!
S muess öbbis go, sunscht isch es z spoot, me muess nur welle -
und für e Morgestraich zäh Schneekanone bstelle!
Im Baselbiet wird glyy dr Alkohol verbotte,
will sich grad Jungi d Lampe nit scho fülle sotte.
Kai Wunder, dringgt dört Jung und Alt e son e Huffe,
denn s Baselbieter Wasser kasch jo nümme suffe!

Dä Blocher maint: mer schigge gar nüt meh in Kongo!
Dört haig jo jede – und das längi – zwei, drei Bongo.
Entwickligshilf, das bringi nüt, das syg dernääbe!
Das stimmt: für ihn isch wirgglig jeedi Hilf vergääbe!

Me sott mit Nagellack im Flugi nüt riskiere,
au könnti s Antischuppeschampoo explodiere.
Akuti Absturzgfohr bestoht in Nylonsogge –
doch s Schlimmschte wär, wenn zvorderscht wurd dr Corti hogge!

Viva Grischun spezial cantun - du kooge Schnööri!
Sas pitsch la Punt Chamuesch Filisur - bun di, Calööri!
Dorma bain in Madulain – dasch’s naimeduure
scho gsi, wenn z Flims e baar wänn Friehromanisch schnuure!

Dr Minu het no däm sy lang hänn miesse warte,
richtig Rom uf s Hochzytsraisli dörfe starte.
Do froggt dr Papscht, won är ihn drifft bim Ykaufs-Bummle:
Jä, sinn jetzt Sii e sone neui Basler Drummle?

Zum Putin sait d Frau Merkel: was isch loos, Wladiimir?
S kunnt kai Öl meh - doch är dänggt: Jä doo ka sii mir!
Das Öl, das bruuch y sälber, höörsch en giftig zische,
y waiss no mängge, won em s wott ins Ässe mische!

S git wäg de Märtplatz-Lampe Lämpe, will d Lüt fände,
wenn d als im Näscht liggsch, wurde d Lämpelampe blände.
Druffabe froggt d Regierig barsch und duet bedoone:
wohär sii wüsse solle, ass no Lüt doo wohne!

Dä Winter isch jo wie dr Summer: zimmlig drogge!
Wenn’ s schneit, denn schneit’s pro Monet höggschtens zwei, drei Flogge.
Jetz mien sich d Zürcher wäg em Grillverbott verbürge
und statt verbrenne - ihre Böögg denn halt verwürge!