(Zwei Zeilen nur Gitarre
Köpfe zusammen und tuscheln.)
Äxgyysi, Si glaube nit, was do grad abgoot
Mir weele fir d SVP der nei Bundesroot

Wo der Blocher muess goo, isch der Couchepin ganz fescht entsetzt
"Mon petit Duce, was machsch denn du jetzt?
Isch gib dir der Root und zum Abschyd au no e Schmutz
Kauf du dir in Basel denn der Bruuni Mutz."

Nääbeduure, zwischeduure, ääneduure, hindeduure
Isch das nit biirewaich so naimeduure.
Hänn Si s verroote, was das isch, ojeeminee:
Das isch doch s Barteiprofil vo der CVP.

Das Renne per Weeloo, das nennt me doch Tour de France
En Uusdrugg wo besser basst isch Tour de Trance.
D Hingis die lacht und wird root als wie feschter
Und maint ganz lakonisch, das isch Schnee vo geschter.

Bi der Schneidere gheerts zu de Frooge, de haiggle
Wie kaa me die Frau numme sinnvoll recycle?
D Herzog, wo soo gäärn no d Styyre duet sängge
Die kennt me ganz aifach der Hailsarmee schängge.

Äär kaa nit nur s Aimolais, au scho graad s Zwaimolzwai
Im Schryybe isch äär der Bescht und zwoor elai.
Als Wunderkind het äär graad geschtert en Uffstand gemacht
Und forderet grossartig s Stimmrächt ab acht.

Ich mecht kenne singe und wurd gäärn im Fäärnsee koo
Als Superstar, Singstar oder iirged eso.
Mit folgendem Lied sotts glaub gar nit so haiggel syy
"Ich bi s Anggewegglimaiteli...."

Amerika macht jetz graad wiider e grosses Gschyss
Obama oder Clinton - schwarz oder wyss
In Franggryych do hämmer der Nicolas Sarkozy
Bi im muess es aifach nur e Bruni syy.

Parkruurmgebyyre und denne no Stroossezoll
Benzinzueschlaag, Styyre, das find ich nit toll.
Drum haani, well s ainiges weniger koschtet
En Easy-Jet-Umwält-Abonnemänt boschtet.

Hinter em Minschter, uff unserer scheene Pfalz
BIaant me e VIP-Empfang, allne Lyt gfallts.
I mecht mi ganz fescht bi der UEFA bedangge
Myni Weggli verkauf ich denn fir hundert Frangge.